СЕНТЯБРЬ

1. НАЧАЛО ИНДИКТА, СИРЕЧЬ НОВАГО ЛЕТА

Тропарь, глас 2:

Всея́ тва́ри Соде́телю, / времена́ и ле́та во Свое́й вла́сти положи́вый, / благослови́ вене́ц ле́та бла́гости Твоея́, Го́споди, / сохраня́я в ми́ре лю́ди и град Твой / моли́твами Богоро́дицы и спаси́ ны.

Богородичен, глас 1:

Ра́дуйся, обра́дованная Богоро́дице Де́во, / приста́нище и предста́тельство ро́да челове́ческаго, / из Тебе бо воплоти́ся Изба́витель ми́ра: / Еди́на бо еси́ Ма́ти и Де́ва, присноблагослове́нная и препросла́вленная, / моли́ Христа́ Бо́га, / мир дарова́ти всей вселе́нней.

Кондак, глас 2:

В Вы́шних живы́й, Христе́ Царю́, / всех ви́димых и неви́димых Тво́рче и Зижди́телю, / И́же дни и но́щи, времена́ и ле́та сотвори́вый, / благослови́ ны́не вене́ц ле́та, / соблюди́ и сохрани́ в ми́ре град и лю́ди Твоя́, / Многоми́лостиве.

7. ПРЕДПРАЗДНСТВО РОЖДЕСТВА ПРЕСВЯТЫЯ БОГОРОДИЦЫ

Тропарь, глас 4:

От ко́рене Иессе́ева и от чресл Дави́довых / Богоотрокови́ца Мариа́м ражда́ется днесь нам, / ра́достию бо ра́дуются вся́ческая и обновля́ются. / Сра́дуйтеся ку́пно, Не́бо и земля́, / восхвали́те Ю́, оте́чествия язы́ков! / Иоаки́м весели́тся, и А́нна торжеству́ет, зову́щи: / непло́ды ражда́ет Богоро́дицу и Пита́тельницу Жи́зни на́шея.

Кондак, глас 3:

Де́ва днесь и Богоро́дица Мари́я, / черто́г безконе́чный Небе́снаго Жениха́, ражда́ется / от непло́дове, Бо́жиим Сове́том, / колесни́ца Сло́ва благоукраша́ется: / на сие́ бо преднарече́ся боже́ственная дверь / и Ма́ти су́щия Жи́зни.

8. РОЖДЕСТВО ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный.

Кондак, глас 4:

Иоаки́м и А́нна поноше́ния безча́дства / и Ада́м и Éва от тли сме́ртныя свободи́стася, Пречи́стая, / во святе́м рождестве́ Твое́м. / То пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: / непло́ды ражда́ет Богоро́дицу и Пита́тельницу Жи́зни на́шея.

13. ПАМЯТЬ ОБНОВЛЕНИЯ ХРАМА ВОСКРЕСЕНИЯ ХРИСТОВА В ИЕРУСАЛИМЕ (ВОСКРЕСЕНИЕ СЛОВУЩЕЕ) (335). ПРЕДРАЗДНСТВО ВОЗДВИЖЕНИЯ ЧЕСТНАГО И ЖИВОТВОРЯЩЕГО КРЕСТА ГОСПОДНЯ

Тропарь, глас 4:

Я́коже вы́шния тве́рди благоле́пие, / и ни́жнюю споказа́л еси́ красоту́ свята́го селе́ния сла́вы Твоея́, Го́споди, / утверди́ сие́ во век ве́ка / и приими́ на́ша в нем непреста́нно приноси́мая Тебе́ моле́ния, Богоро́дицею, / всех Животе́ и Воскресе́ние.

Кондак, глас 2:

Обновле́ния Ду́ха в сердца́х / и просвеще́ние вну́тренним да́руй / ве́рою соверша́ющим свяще́нная обновле́ния хра́ма до́му Твоего́, / ему́же благоволи́л еси́ созда́тися в Твое́ Боже́ственное и́мя, / Еди́не во святы́х Прославля́емый.

14. ВСЕМИРНОЕ ВОЗДВИЖЕНИЕ ЧЕСТНАГО И ЖИВОТВОРЯЩЕГО КРЕСТА ГОСПОДНЯ

Тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя / и Твое́ сохраня́я Кресто́м Твои́м жи́тельство.

Кондак, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

21. СВЯТИТЕЛЯ ДИМИТРИЯ, МИТРОПОЛИТА РОСТОВСКАГО (ОБРЕТЕНИЕ МОЩЕЙ, 1752)

Тропарь, глас 8:

Правосла́вия ревни́телю и раско́ла искорени́телю, / Росси́йский целе́бниче и но́вый к Бо́гу моли́твенниче, / списа́ньми твои́ми бу́их уцелому́дрил еси́, / цевни́це духо́вная, Дими́трие блаже́нне, / моли́ Христа́ Бо́га спасти́ся душа́м на́шим.

Кондак, глас 8:

Звезду́ Росси́йскую, от Ки́ева возсия́вшую, / и чрез Но́вград Се́верский в Росто́в дости́гшую, / всю же страну́ сию́ уче́ньми и чудесы́ озари́вшую, / ублажи́м златослове́снаго учи́теля Дими́трия: / той бо всем вся написа́, я́же к наставле́нию, / да всех приобря́щет, я́коже Па́вел, Христу́ / и спасе́т правове́рием ду́ши на́ша.

23. ЗАЧАТИЕ ЧЕСТНАГО СЛАВНАГО ПРОРОКА, ПРЕДТЕЧИ И КРЕСТИТЕЛЯ ГОСПОДНЯ ИОАННА

Тропарь, глас 4:

Пе́рвее неражда́ющая непло́ды, возвесели́ся, / се бо зачала́ еси́ Со́лнца свети́льника я́ве, / просвеща́ти иму́ща всю вселе́нную, слепото́ю неду́гующую. / Лику́й, Заха́рие, вопия́ со дерзнове́нием: / проро́к Вы́шняго есть хотя́й роди́тися.

Кондак, глас 1:

Весели́тся све́тло Заха́рия вели́кий / со всесла́вною Елисаве́тию сопру́жницею, / досто́йно зачина́юще Иоа́нна Предте́чу, / его́же Арха́нгел благовести́, ра́дуяся, / и челове́цы достодо́лжно почти́м, / я́ко таи́нника благода́ти.

25. ПРЕПОДОБНАГО СЕРГИЯ, ИГУМЕНА РАДОНЕЖСКАГО, И ВСЕЯ РОССИИ ЧУДОТВОРЦА (1392)

Тропарь, глас 4:

И́же доброде́телей подви́жник, / я́ко и́стинный во́ин Христа́ Бо́га, / на стра́сти вельми́ подвиза́лся еси́ в жи́зни вре́менней, / в пе́ниих, бде́ниих же и поще́ниих о́браз быв твои́м ученико́м, / те́мже и всели́ся в тя Пресвяты́й Дух, / Его́же де́йствием све́тло укра́шен еси́; / но, я́ко име́я дерзнове́ние ко Святе́й Тро́ице, / помина́й ста́до, е́же собра́л еси́, му́дре, / и не забу́ди, я́коже обеща́лся еси́, / посеща́я чад твои́х, / Се́ргие, преподо́бне о́тче наш.

Кондак, глас 8:

Христо́вою любо́вию уязви́вся, преподо́бне, / и Тому́ невозвра́тным жела́нием после́довав, / вся́кое наслажде́ние плотско́е возненави́дел еси́ / и, я́ко со́лнце, Оте́честву твоему́ возсия́л еси́; / тем и Христо́с да́ром чуде́с обогати́ тя. / Помина́й нас, чту́щих пресве́тлую па́мять твою́, да зове́м ти: / ра́дуйся, Се́ргие богому́дре.

26. СВЯТАГО АПОСТОЛА И ЕВАНГЕЛИСТА ИОАННА БОГОСЛОВА (НАЧ. II)

Тропарь, глас 2:

Апо́столе, Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа / И́же па́дша на пе́рси Прие́мый, / Его́же моли́, Богосло́ве, / и належа́щую мглу язы́ков разгна́ти, / прося́ нам ми́ра и ве́лия ми́лости.

Кондак, глас 2:

Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, / я́ко Богосло́в и друг Христо́в.

ОКТЯБРЬ

1. ПОКРОВ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Днесь благове́рнии лю́дие све́тло пра́зднуем, / осеняе́ми Твои́м, Богома́ти, прише́ствием, / и к Твоему́ взира́юще пречи́стому о́бразу, уми́льно глаго́лем: / покры́й нас честны́м Твои́м Покро́вом / и изба́ви нас от вся́каго зла, / моля́щи Сы́на Твоего́, Христа́ Бо́га на́шего, / спасти́ ду́ши на́ша.

Кондак, глас 3:

Де́ва днесь предстои́т в це́ркви / и с ли́ки святы́х неви́димо за ны мо́лится Бо́гу, / А́нгели со архиере́и покланя́ются, / апо́столи же со проро́ки ликовству́ют: / нас бо ра́ди мо́лит Богоро́дица Преве́чнаго Бо́га.

5. СОБОР СВЯТИТЕЛЕЙ МОСКОВСКИХ: ПЕТРА (1326), АЛЕКСИЯ (1378), ИОНЫ (1461), ФИЛИППА (1569) И ЕРМОГЕНА (1612)

Тропарь, глас 4:

Первопресто́льницы Росси́йстии, / и́стиннии храни́телие апо́стольских преда́ний, / столпи́ непоколеби́мии, правосла́вия наста́вницы, / Пе́тре, Алекси́е, Ио́но, Фили́ппе и Ермоге́не, / Влады́ку всех моли́те / мир вселе́нней дарова́ти, / и душа́м на́шим ве́лию ми́лость.

Кондак, глас 3:

Во святи́телех благоче́стно пожи́сте, / и лю́ди к богоразу́мию наста́висте, / и до́бре Бо́гу угоди́сте, / сего́ ра́ди от Него́ нетле́нием / и чудесы́ просла́вистеся, / я́ко ученицы́ Бо́жия благода́ти.

6. СВЯТАГО И СЛАВНАГО АПОСТОЛА ФОМЫ (I)

Тропарь, глас 3:

Апо́столе святы́й Фомо́, / моли́ Ми́лостивого Бо́га, / да прегреше́ний оставле́ние / пода́ст душа́м на́шим.

Или иный, глас 2:

Учени́к Христо́в быв, / Боже́ственнаго собо́ра апо́стольскаго соприча́стник, / неве́рствием бо Христо́во Воскресе́ние извести́в / и Того́ пречи́стую страсть осяза́нием уве́рив, Фомо́ всехва́льне, / и ны́не нам проси́ ми́ра и ве́лия ми́лости.

Кондак, глас 4:

Прему́дрости благода́ти испо́лнен, / Христо́в апо́стол / и служи́тель и́стинный / в покая́нии вопия́ше Тебе́: / Ты мой еси́ Бог же и Госпо́дь.

9. СВЯТАГО АПОСТОЛА ИАКОВА АЛФЕЕВА (I)

Тропарь, глас 3:

Апо́столе святы́й Иа́кове, / моли́ ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 2:

Тве́рдо му́дрости догма́ты в ду́ши благочести́вых вложи́вшаго, / похвала́ми да ублажи́м я́ко боговеща́теля вси Иа́кова: / Престо́лу бо сла́вы Влады́чню предстоя́, / и со все́ми А́нгелы ра́дуется, / моля́ непреста́нно о всех нас.

10. ПРЕПОДОБНАГО АМВРОСИЯ ОПТИНСКАГО (1891)

Тропарь, глас 5:

Я́ко к целе́бному исто́чнику, / притека́ем к тебе́, Амвро́сие, о́тче наш, / ты бо на путь спасе́ния нас ве́рно наставля́еши, / моли́твами от бед и напа́стей охраня́еши, / в теле́сных и душе́вных ско́рбех утеша́еши, / па́че же смире́нию, терпе́нию и любве́ науча́еши; / моли́ Человеколю́бца Христа́ / и Засту́пницу усе́рдную / спасти́ся душа́м на́шим.

Кондак, глас 2:

Заве́т Пастыренача́льника испо́лнив, / ста́рчества благода́ть насле́довал еси́, / боле́знуя се́рдцем о всех, с ве́рою притека́ющих к тебе́. / Те́мже и мы, ча́да твоя́, с любо́вию вопие́м ти: / о́тче святы́й Амвро́сие, / моли́ Христа́ Бо́га спасти́ся душа́м на́шим.

В НЕДЕЛЮ, БЛИЖАЙШУЮ К 11 ОКТЯБРЯ. СВЯТЫХ ОТЕЦ СЕДМАГО ВСЕЛЕНСКАГО СОБОРА (787)

Тропарь святых отец, глас 8:

Препросла́влен еси́, Христе́ Бо́же наш, / свети́ла на земли́ отцы́ на́ши основа́вый, / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́.

Кондак, глас 6:

И́же из Отца́ возсия́в Сын неизрече́нно, / из Жены́ роди́ся, сугу́б естество́м, / Его́же ви́дяще, не отмета́емся зра́ка изображе́ния, / но, сие́ благоче́стно начерта́юще, / почита́ем ве́рно. / И сего́ ра́ди и́стинную ве́ру Це́рковь держа́щи, / лобыза́ет ико́ну вочелове́чения Христо́ва.

13. ПРАЗДНЕСТВО ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ ИКОНЫ ЕЯ «ИВЕРСКИЯ» (ПРЕНЕСЕНИЕ В МОСКВУ, 1648)

Тропарь, глас 1:

От святы́я ико́ны Твоея́, / о Влады́чице Богоро́дице, / исцеле́ния и цельбы́ подаю́тся оби́льно, / с ве́рою и любо́вию приходя́щим к ней. / Та́ко и мою́ не́мощь посети́, / и ду́шу мою́ поми́луй, Блага́я, / и те́ло исцели́ благода́тию Твое́ю, Пречи́стая.

Кондак, глас 8:

А́ще и в мо́ре вве́ржена бысть свята́я ико́на Твоя́, Богоро́дице, / от вдови́цы, не могу́щия спасти́ сию́ от враго́в, / но яви́лася есть храни́тельница Афо́на / и врата́рница оби́тели И́верския, враги́ устраша́ющая / и в правосла́вней Росси́йстей стране́ / чту́щия Тя от всех бед и напа́стей избавля́ющая.

18. СВЯТАГО АПОСТОЛА И ЕВАНГЕЛИСТА ЛУКИ (I)

Тропарь, глас 5:

Апо́стольских дея́ний сказа́теля / и Ева́нгелия Христо́ва све́тла списа́теля, / Луку́ препе́таго, / сла́вна су́ща Христо́ве Це́ркви, / пе́сньми свяще́нными свята́го апо́стола похва́лим, / я́ко врача́ су́ща челове́ческия не́мощи, / естества́ неду́ги и я́зи душ исцеля́юща / и моля́щася непреста́нно за ду́ши на́ша.

Кондак, глас 2:

И́стиннаго благоче́стия пропове́дника / и та́ин неизрече́нных ри́тора, / звезду́ церко́вную, Луку́ Боже́ственнаго восхва́лим: / Сло́во бо его́ избра́, с Па́влом му́дрым язы́ков учи́теля, / Еди́н ве́дый серде́чная.

22. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ РАДИ ИКОНЫ ЕЯ «КАЗАНСКИЯ» (ИЗБАВЛЕНИЕ ОТ ЛЯХОВ, 1612)

Тропарь, глас 4:

Засту́пнице усе́рдная, / Ма́ти Го́спода Вы́шняго, / за всех мо́лиши Сы́на Твоего́, Христа́ Бо́га на́шего, / и всем твори́ши спасти́ся, / в держа́вный Твой покро́в прибега́ющим. / Всех нас заступи́, о Госпоже́ Цари́це и Влады́чице, / и́же в напа́стех, и ско́рбех, и в боле́знех, обремене́нных грехи́ мно́гими, / предстоя́щих и моля́щихся Тебе́ умиле́нною душе́ю / и сокруше́нным се́рдцем, / пред пречи́стым Твои́м о́бразом со слеза́ми, / и невозвра́тно наде́жду иму́щих на Тя / избавле́ния всех зол. / Всем поле́зная да́руй / и вся спаси́, Богоро́дице Де́во: / Ты бо еси́ Боже́ственный покро́в рабо́м Твои́м.

Кондак, глас 8:

Притеце́м, лю́дие, к ти́хому сему́ и до́брому приста́нищу, / ско́рой Помо́щнице, гото́вому и те́плому спасе́нию, покро́ву Де́вы, / ускори́м на моли́тву и потщи́мся на покая́ние, / источа́ет бо нам неоску́дныя ми́лости Пречи́стая Богоро́дица, / предваря́ет на по́мощь и избавля́ет от вели́ких бед и зол / благонра́вныя и богобоя́щияся рабы́ Своя́.

23. СВЯТАГО АПОСТОЛА ИАКОВА, БРАТА ГОСПОДНЯ ПО ПЛОТИ (ОК. 63)

Тропарь, глас 2:

Я́ко Госпо́день учени́к восприя́л еси́, пра́ведне, Ева́нгелие, / я́ко му́ченик и́маши е́же неопи́санное, / дерзнове́ние я́ко брат Бо́жий, / е́же моли́тися я́ко иера́рх: / моли́ Христа́ Бо́га спасти́ся душа́м на́шим.

Кондак, глас 4:

О́тчее Единоро́дное Бог Сло́во, / прише́дшее к нам в после́дния дни, / Иа́кове Боже́ственне, / пе́рваго тя показа́ / иерусали́млян па́стыря и учи́теля, / и ве́рнаго строи́теля та́инств духо́вных: / те́мже тя вси чтим, апо́столе.

24. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ РАДИ ИКОНЫ ЕЯ «ВСЕХ СКОРБЯЩИХ РАДОСТИ» (1688)

Тропарь, глас 2:

Всех скорбя́щих Ра́досте, / и оби́димых Засту́пнице, / и а́лчущих Пита́тельнице, / странных утеше́ние, / обурева́емых приста́нище, / больны́х посеще́ние, / немощны́х покро́ве и Засту́пнице, / же́зле ста́рости, / Ма́ти Бо́га Вы́шняго Ты еси́, Пречи́стая: / потщи́ся, мо́лимся, спасти́ся рабо́м Твои́м.

Кондак, глас 6:

Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице, / Ты нам помози́: / на Тебе́ наде́емся / и Тобо́ю хва́лимся, / Твои́ бо есмы́ раби́, / да не постыди́мся.

26. ВОСПОМИНАНИЕ ВЕЛИКАГО И СТРАШНАГО ТРУСА (ТРЯСЕНИЯ) В ЦАРЕГРАДЕ (740)

Тропарь, глас 8:

Призира́яй на зе́млю и творя́й ю́ трясти́ся, / изба́ви ны стра́шнаго тру́са преще́ния, Христе́ Бо́же наш, / и низпосли́ нам бога́тыя ми́лости Твоя́ / моли́твами Богоро́дицы, и спаси́ ны.

Кондак, глас 6:

Изба́ви тру́са тя́жкаго всех нас, Го́споди, / и я́звы нестерпи́мыя грех ра́ди на́ших, / пощади́, Го́споди, правосла́вныя лю́ди Твоя́, / я́же стяжа́л еси́ Твое́ю Кро́вию, Влады́ко; / и град не преда́ждь в поги́бель тру́сом стра́шным, / ино́го бо, ра́зве Тебе́, Бо́га не ве́мы, / и воззови́ пою́щим: / Аз есмь с ва́ми, и никто́же на вы.

СВЯТАГО И СЛАВНАГО ВЕЛИКОМУЧЕНИКА ДИМИТРИЯ СОЛУНСКАГО, МИРОТОЧЦА (ОК. 306)

Тропарь, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся / дарова́ти нам ве́лию ми́лость.

Кондак, глас 2:

Крове́й твои́х струя́ми, Дими́трие, / Це́рковь Бог обагри́, / да́вый тебе́ кре́пость непобеди́мую / и соблюда́я град твой невреди́м; / того́ бо еси́ утвержде́ние.

НОЯБРЬ

1. СВЯТЫХ БЕЗСРЕБРЕНИКОВ И ЧУДОТВОРЦЕВ КОСМЫ И ДАМИАНА, ИЖЕ ОТ АСИИ, И МАТЕРИ ИХ ПРЕПОДОБНЫЯ ФЕОДОТИИ (III)

Тропарь, глас 8:

Святи́и безсре́бреницы и чудотво́рцы, Космо́ и Дамиа́не, / посети́те не́мощи на́ша: / ту́не прия́сте, ту́не дади́те нам.

Кондак, глас 2:

Благода́ть прии́мше исцеле́ний, / простира́ете здра́вие су́щим в ну́ждах, / вра́чеве, чудотво́рцы пресла́внии, / но ва́шим посеще́нием ра́тников де́рзости низложи́те, / мир исцеля́юще чудесы́.

8. СОБОР СВЯТАГО АРХИСТРАТИГА МИХАИЛА И ПРОЧИХ НЕБЕСНЫХ СИЛ БЕЗПЛОТНЫХ. АРХАНГЕЛОВ: ГАВРИИЛА, РАФАИЛА, УРИИЛА, СЕЛАФИИЛА, ИЕГУДИИЛА, ВАРАХИИЛА И ИЕРЕМИИЛА

Тропарь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

13. СВЯТИТЕЛЯ ИОАННА ЗЛАТОУСТАГО, АРХИЕПИСКОПА КОНСТАНТИНОПОЛЬСКАГО (407)

Тропарь, глас 8:

Уст твои́х, я́коже све́тлость огня́ возсия́вши, благода́ть / вселе́нную просвети́: / не сребролю́бия ми́рови сокро́вища сниска́, / высоту́ нам смиренному́дрия показа́, / но, твои́ми словесы́ наказу́я, о́тче Иоа́нне Златоу́сте, / моли́ Сло́ва Христа́ Бо́га спасти́ся душа́м на́шим.

Кондак, глас 6:

От Небе́с прия́л еси́ Боже́ственную благода́ть / и твои́ми устна́ми вся учи́ши / покланя́тися в Тро́ице Еди́ному Бо́гу, / Иоа́нне Златоу́сте, всеблаже́нне преподо́бне, / досто́йно хва́лим тя: / еси́ бо наста́вник, / я́ко Боже́ственная явля́я.

14. СВЯТАГО АПОСТОЛА ОТ 12-ТИ ФИЛИППА (ОК. 81-96)

Тропарь, глас 3:

Благоукраша́ется вселе́нная, / Ефио́пия ликовству́ет, / я́ко венце́м красу́ема, / тобо́ю просвети́вшися, / све́тло торжеству́ет па́мять твою́, / богоглаго́ливе Фили́ппе; / вся бо ве́ровати Христу́ научи́л еси́ / и тече́ние соверши́л досто́йно Ева́нгелия. / Тем дерзнове́нно вари́т Ефио́пская рука́ к Бо́гу, / Его́же моли́ дарова́ти нам ве́лию ми́лость.

Кондак, глас 8:

Учени́к, и друг Твой, и подража́тель стра́сти Твоея́, / вселе́нней Бо́га Тя пропове́да Богоглаго́ливый Фили́пп; / того́ моли́твами от враго́в пребеззако́нных / Це́рковь Твою́ и всяк град Твой / Богоро́дицею соблюди́, Многоми́лостиве.

16. СВЯТАГО АПОСТОЛА И ЕВАНГЕЛИСТА МАТФЕЯ (60)

Тропарь, глас 3:

Усе́рдно от мы́тницы к зва́вшему Влады́це Христу́, / я́вльшуся на земли́ челове́ком за бла́гость, / Тому́ после́довав, апо́стол избра́нный яви́лся еси́ / и благове́стник Ева́нгелия вселе́нней велегла́сен. / Сего́ ра́ди чтим честну́ю па́мять твою́, Матфе́е богоглаго́ливе, / моли́ Ми́лостиваго Бо́га, / да грехо́в оставле́ние пода́ст душа́м на́шим.

Кондак, глас 4:

Мыта́рства и́го отве́рг, / пра́вды и́гу притя́глся еси́ / и яви́лся еси́ купе́ц всеизря́днейший, / бога́тство прине́с ю́же с высоты́ прему́дрость. / Отону́дуже пропове́дал еси́ и́стины сло́во / и уны́лых воздви́гл еси́ ду́ши, / написа́в час су́дный.

21. ВВЕДЕНИЕ ВО ХРАМ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Днесь благоволе́ния Бо́жия предображе́ние / и челове́ков спасе́ния пропове́дание / в хра́ме Бо́жии я́сно Де́ва явля́ется / и Христа́ всем предвозвеща́ет. / Той и мы велегла́сно возопии́м: / ра́дуйся, / смотре́ния Зижди́телева исполне́ние.

Кондак, глас 4:

Пречи́стый храм Спа́сов, / многоце́нный черто́г и Де́ва, / свяще́нное сокро́вище сла́вы Бо́жия, / днесь вво́дится в дом Госпо́день, благода́ть совводя́щи, / Я́же в Ду́се Боже́ственном, / Ю́же воспева́ют А́нгели Бо́жии: / Сия́ есть селе́ние Небе́сное.

23. СВЯТАГО БЛАГОВЕРНАГО ВЕЛИКАГО КНЯЗЯ АЛЕКСАНДРА НЕВСКАГО, В СХИМЕ АЛЕКСИЯ, ВСЕЯ РОССИИ ЧУДОТВОРЦА (14 НОЯБРЯ 1263)

Тропарь, глас 4:

Я́ко благочести́ваго ко́рене / пречестна́я о́трасль был еси́, блаже́нне Алекса́ндре, / яви́ бо тя Христо́с, я́ко не́кое Боже́ственное сокро́вище Росси́йстей земли́, / но́ваго чудотво́рца, пресла́вна и богоприя́тна. / И днесь соше́дшеся в па́мять твою́ ве́рою и любо́вию, / во псалме́х и пе́ниих ра́дующеся, сла́вим Го́спода, / да́вшаго тебе́ благода́ть исцеле́ний, / Его́же моли́ спасти́ град сей, / и держа́ве Росси́йстей богоуго́дней бы́ти, / и сыново́м Росси́йским спасти́ся.

Кондак, глас 8:

Я́ко звезду́ тя пресве́тлу, почита́ем, от восто́ка возсия́вшую и на за́пад прише́дшую, / всю бо страну́ сию́ чудесы́ и добро́тою обогаща́еши / и просвеща́еши ве́рою чту́щия па́мять твою́, Алекса́ндре блаже́нне. / Сего́ ра́ди днесь пра́зднуем твое́ успе́ние, лю́дие твои́ су́щии: / моли́ спасти́ Оте́чество твое́ / и вся притека́ющия к ра́це моще́й твои́х и ве́рно вопию́щия ти: / ра́дуйся, гра́ду на́шему утвержде́ние.

24. СВЯТЫЯ ВЕЛИКОМУЧЕНИЦЫ ЕКАТЕРИНЫ (ОК. 305–313)

Тропарь, глас 4:

Доброде́тельми, я́ко луча́ми со́лнечными, / просвети́ла еси́ неве́рныя мудрецы́, / и, я́коже пресве́тлая луна́ ходя́щим в нощи́, / неве́рия тьму отгна́ла еси́ / и цари́цу уве́рила еси́, / вку́пе же и мучи́теля обличи́ла еси́, / богозва́нная неве́сто, блаже́нная Екатери́но, / жела́нием востекла́ еси́ в Небе́сный черто́г / к прекра́сному Жениху́ Христу́, / и от Него́ ца́рским венце́м венча́лася еси́: / Ему́же, со А́нгелы предстоя́щи, / за ны моли́ся, / творя́щия пречестну́ю па́мять твою́.

Кондак, глас 2:

Лик честны́й Боже́ственне, мучениколю́бцы, / воздви́гните ны́не, / почита́юще всему́друю Екатери́ну, / сия́ бо в три́знищи Христа́ пропове́да и зми́я попра́, / ри́торов ра́зумы укроти́вши.

27. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ РАДИ ИКОНЫ ЕЯ «ЗНАМЕНИЕ» (НОВГОРОДСКИЯ, 1170)

Тропарь, глас 4:

Я́ко необори́мую сте́ну и исто́чник чуде́с / стяжа́вше Тя, раби́ Твои́, / Богоро́дице Пречи́стая, / сопроти́вных ополче́ния низлага́ем. / Те́мже мо́лим Тя: / мир гра́ду Твоему́ да́руй / и душа́м на́шим ве́лию ми́лость.

Кондак, глас 4:

Честна́го о́браза Твоего́ зна́мение / пра́зднующе лю́дие Твои́, Богороди́тельнице, / и́мже ди́вную побе́ду на сопроти́вныя гра́ду Твоему́ дарова́ла еси́, / те́мже Тебе́ ве́рою взыва́ем: / ра́дуйся, Де́во, христиа́н похвало́.

30. СВЯТАГО И ВСЕХВАЛЬНАГО АПОСТОЛА АНДРЕЯ ПЕРВОЗВАННАГО (62)

Тропарь, глас 4:

Я́ко апо́столов первозва́нный / и верхо́внаго су́щий брат, / Влады́це всех, Андре́е, моли́ся, / мир вселе́нней дарова́ти / и душа́м на́шим ве́лию ми́лость.

Кондак, глас 2:

Му́жества тезоимени́таго богоглаго́льника / и Це́ркве возсле́дователя верхо́внаго, / Петро́ва сро́дника восхва́лим, / зане́ я́коже дре́вле сему́ / и ны́не нам воззва́: / прииди́те, обрето́хом Жела́емаго.

ДЕКАБРЬ

4. СВЯТЫЯ ВЕЛИКОМУЧЕНИЦЫ ВАРВАРЫ (ОК. 306)

Тропарь, глас 8:

Варва́ру святу́ю почти́м: / вра́жия бо се́ти сокруши́ / и, я́ко пти́ца, изба́вися от них, / по́мощию и ору́жием Креста́, всечестна́я.

Кондак, глас 4:

В Тро́ице благоче́стно пева́емому / после́довавши Бо́гу, страстоте́рпице, / и́дольская притупи́ла еси́ чти́лища, / посреде́ же по́двига страда́льчествующи, Варва́ро, / мучи́телей преще́ния не устраши́лася еси́, мужему́дренная, / велегла́сно пою́щи при́сно: / Тро́ицу чту, Еди́но Божество́.

5. ПРЕПОДОБНАГО САВВЫ ОСВЯЩЕННАГО (532)

Тропарь, глас 8:

Слез твои́х тече́ньми пусты́ни безпло́дное возде́лал еси́, / и и́же из глубины́ воздыха́ньми во сто трудо́в уплодоноси́л еси́, / и был еси́ свети́льник вселе́нней, / сия́я чудесы́, Са́вво, о́тче наш, / моли́ Христа́ Бо́га спасти́ся душа́м на́шим.

Кондак, глас 8:

Я́ко от младе́нства Бо́гу же́ртва непоро́чная / прине́слся еси́ доброде́телию, Са́вво блаже́нне, / садоде́латель быв благоче́стия, / те́мже был еси́ преподо́бных удобре́ние, / граждани́н же пусты́нный достохва́лен. / Те́мже зове́м ти: / ра́дуйся, Са́вво пребога́те.

6. СВЯТИТЕЛЯ НИКОЛАЯ, АРХИЕПИСКОПА МИР ЛИКИЙСКИХ, ЧУДОТВОРЦА (ОК. 345-351)

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

9. ЗАЧАТИЕ СВЯТЫЯ БОГОПРАМАТЕРЕ АННЫ, ЕГДА ЗАЧАТ ПРЕСВЯТУЮ БОГОРОДИЦУ

Тропарь, глас 4:

Днесь безча́дия у́зы разреша́ются, / Иоаки́ма бо и А́нну услы́шав Бог па́че наде́жды, / роди́ти тем я́ве обещава́ет Богоотрокови́цу, / из Нея́же Сам роди́ся Неопи́санный, Челове́к быв, / А́нгелом повеле́в вопи́ти Ей: / ра́дуйся, Благода́тная, / Госпо́дь с Тобо́ю.

Кондак, глас 4:

Пра́зднует днесь вселе́нная / А́ннино зача́тие, / бы́вшее от Бо́га, / и́бо та породи́ / па́че сло́ва Сло́во Ро́ждшую.

НЕДЕЛЯ СВЯТЫХ ПРАОТЕЦ

Тропарь, глас 2:

Ве́рою пра́отцы оправда́л еси́, / от язы́к те́ми предобручи́вый Це́рковь: / хва́лятся в сла́ве святи́и, / я́ко от се́мене их есть Плод благосла́вен, / без се́мене Ро́ждшая Тя. / Тех моли́твами, Христе́ Бо́же, поми́луй нас.

Кондак, глас 6:

Рукопи́саннаго о́браза не поче́тше, / но Неопи́санным Существо́м защити́вшеся, треблаже́ннии, / в по́двизе огня́ просла́вистеся, / среде́ же пла́мене нестерпи́маго стоя́ще, Бо́га призва́сте: / ускори́, о Ще́дрый, / и потщи́ся, я́ко Ми́лостив, в по́мощь на́шу, / я́ко мо́жеши хотя́й.

12. СВЯТИТЕЛЯ СПИРИДОНА, ЕПИСКОПА ТРИМИФУНТСКАГО (ОК. 348)

Тропарь, глас 1:

Собо́ра пе́рваго показа́лся еси́ побо́рник и чудотво́рец, / богоно́се Спиридо́не, о́тче наш. / Те́мже ме́ртву ты во гро́бе возгласи́в, / и змию́ в зла́то претвори́л еси́, / и внегда́ пе́ти тебе́ святы́я моли́твы, / А́нгелы, сослужа́щия тебе́, име́л еси́, свяще́ннейший. / Сла́ва Да́вшему тебе́ кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Кондак, глас 2:

Любо́вию Христо́вою уязви́вся, свяще́ннейший, / ум впери́в заре́ю Ду́ха, / де́тельным виде́нием твои́м дея́ние обре́л еси́, богоприя́тне, / же́ртвенник Боже́ственный быв, / прося́ всем Боже́ственнаго сия́ния.

НЕДЕЛЯ ПРЕД РОЖДЕСТВОМ ХРИСТОВЫМ, СВЯТЫХ ОТЕЦ

Тропарь святых отец, глас 2:

Ве́лия ве́ры исправле́ния: / во исто́чнице пла́мене, я́ко на воде́ упокое́ния, / святи́и трие́ о́троцы ра́довахуся, / и проро́к Дании́л львом па́стырь, я́ко овца́м, явля́шеся. / Тех моли́твами, Христе́ Бо́же, спаси́ ду́ши на́ша.

Кондак, глас 6:

Рукопи́саннаго о́браза не поче́тше, / но Неопи́санным Существо́м защити́вшеся, треблаже́ннии, / в по́двизе огня́ просла́вистеся; / среде́ же пла́мене нестерпи́маго стоя́ще, Бо́га призва́сте: / ускори́, о Ще́дрый! / И потщи́ся, я́ко Ми́лостив, в по́мощь на́шу, / я́ко мо́жеши хотя́й.

20. ПРЕДПРАЗДНСТВО ПО ПЛОТИ РОЖДЕСТВА ГОСПОДА БОГА И СПАСА НАШЕГО ИИСУСА ХРИСТА

Тропарь, глас 4:

Гото́вися, Вифлее́ме: / отве́рзися всем, Еде́ме, / красу́йся, Евфра́фо, / я́ко дре́во живота́ в верте́пе процвете́ от Де́вы: / рай бо О́ноя чре́во яви́ся мы́сленный, / в не́мже Боже́ственный сад, / от него́же я́дше, жи́ви бу́дем, / не я́коже Ада́м у́мрем. / Христо́с ражда́ется пре́жде па́дший возста́вити о́браз.

Кондак, глас 1:

Весели́ся, Вифлее́ме, Евфра́фо, гото́вися: / се бо А́гница, Па́стыря вели́каго во утро́бе нося́щи, е́же роди́ти тщи́тся, / Его́же зря́ще, Богоно́снии отцы́ веселя́тся, / с па́стырьми пою́ще Де́ву доя́щую.

СВЯТАГО ПРАВЕДНАГО ПРЕСВИТЕРА ИОАННА КРОНШТАДТСКАГО (1908)

Тропарь, глас 1:

Правосла́вныя ве́ры побо́рниче, / земли́ Росси́йския печа́льниче, / па́стырем пра́вило и о́бразе ве́рным, / покая́ния и жи́зни во Христе́ пропове́дниче, / Боже́ственных Та́ин благогове́йный служи́телю / и дерзнове́нный о лю́дех моли́твенниче, / о́тче пра́ведный Иоа́нне, / цели́телю и преди́вный чудотво́рче, / гра́ду Кроншта́дту похвало́ / и Це́ркве на́шея украше́ние, / моли́ Всеблага́го Бо́га / умири́ти мир и спасти́ ду́ши на́ша.

Кондак, глас 3:

Днесь па́стырь Кроншта́дтский предстои́т Престо́лу Бо́жию / и усе́рдно мо́лит о ве́рных / Христа́ Пастыренача́льника, / обе́тование да́вшаго: / сози́жду Це́рковь Мою́, / и врата́ а́дова не одоле́ют ей.

21. СВЯТИТЕЛЯ ПЕТРА, МИТРОПОЛИТА МОСКОВСКАГО И ВСЕЯ РОССИИ ЧУДОТВОРЦА (1326)

Тропарь, глас 4:

Я́же пре́жде безпло́дная, земле́, / ны́не весели́ся: / се бо Христо́с свети́льника в тебе́ показа́, / я́ве сия́юща в ми́ре / и исцелева́юща неду́ги и боле́зни на́ша. / Сего́ ра́ди лику́й и весели́ся со дерзнове́нием: / святи́тель бо есть Вы́шняго сия́ соде́ловаяй.

Кондак, глас 8:

Взбра́нному и ди́вному на́шея земли́ чудотво́рцу, / днесь любо́вию тебе́ притека́ем, песнь богоно́се, плету́ще, / я́ко име́я дерзнове́ние ко Го́споду, / многообра́зных изба́ви нас обстоя́ний, да зове́м ти: / ра́дуйся, утвержде́ние гра́ду на́шему.

24. ПРЕДПРАЗДНСТВО РОЖДЕСТВА ХРИСТОВА, И ПАМЯТЬ СВЯТЫЯ ПРЕПОДОБНОМУЧЕНИЦЫ ЕВГЕНИИ (ОК. 262)

Тропарь, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя рождества́, / и ме́сто ни еди́ноже бе обита́лищу, / но, я́коже кра́сная пала́та, / верте́п Цари́це показа́шеся. / Христо́с ражда́ется / пре́жде па́дший воскреси́ти о́браз.

Тропарь преподобномученице, глас 4:

А́гница Твоя́, Иису́се, Евге́ния / зове́т ве́лиим гла́сом: / Тебе́, Женише́ мой, люблю́, / и, Тебе́ и́щущи, страда́льчествую, / и сраспина́юся, и спогреба́юся Креще́нию Твоему́, / и стражду́ Тебе́ ра́ди, / я́ко да ца́рствую в Тебе́, / и умира́ю за Тя, да и живу́ с Тобо́ю, / но я́ко же́ртву непоро́чную, приими́ мя, с любо́вию поже́ршуюся Тебе́. / Тоя́ моли́твами, / я́ко Ми́лостив, спаси́ ду́ши на́ша.

Кондак, глас 3:

Де́ва днесь Преве́чное Сло́во / в верте́пе гряде́т роди́ти неизрече́нно; / лику́й, вселе́нная, услы́шавши, / просла́ви со А́нгелы и па́стырьми / хотя́щаго яви́тися Отроча́ Мла́до, / Преве́чнаго Бо́га.

Кондак святыя, глас 2:

Благоро́дия нра́вом тя честноподо́бне украси́в обожи́вый Госпо́дь, / в ра́бии о́бразе от Де́вы нам соедини́ся, / И́же тя в лик дев свещено́сиц вчини́ / и с му́ченики сочета́, Евге́ние, / я́ко вои́стинну благоро́дия Боже́ственныя сла́вы вене́ц улучи́.

25. РОЖДЕСТВО ГОСПОДА БОГА И СПАСА НАШЕГО ИИСУСА ХРИСТА

Тропарь, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети, с высоты́ Восто́ка. / Го́споди, сла́ва Тебе́.

Кондак, глас 3:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.

26. СОБОР ПРЕСВЯТЫЯ БОГОРОДИЦЫ

Тропарь, глас 4:

Пречи́стая Богома́ти, Богоро́дице, / Собо́р Твой честны́й украше́н многоразли́чными добро́тами, / да́ры Ти прино́сят, Госпоже́, мно́ги мирсти́и лю́дие, / у́зы на́ша гре́шныя раздери́ Свое́ю ми́лостию / и спаси́ ду́ши на́ша.

Кондак, глас 6:

И́же пре́жде денни́цы от Отца́ без ма́тере роди́выйся, / на земли́ без отца́ воплоти́ся днесь из Тебе́. / Те́мже звезда́ благовеству́ет волхво́м, / А́нгели же с па́стырьми пою́т / несказа́нное Рождество́ Твое́, Благода́тная.

НЕДЕЛЯ ПО РОЖДЕСТВЕ ХРИСТОВОМ. СВЯТЫХ ПРАВЕДНЫХ ИОСИФА ОБРУЧНИКА, ДАВИДА ЦАРЯ И ИАКОВА, БРАТА ГОСПОДНЯ ПО ПЛОТИ

Тропарь, глас 2:

Благовеству́й, Ио́сифе, Дави́ду чудеса́, Богоотцу́: / Де́ву ви́дел еси́ ро́ждшую, / с па́стыри славосло́вил еси́, / с волхвы́ поклони́лся еси́, / А́нгелом весть прие́м. / Моли́ Христа́ Бо́га спасти́ ду́ши на́ша.

Кондак, глас 3:

Весе́лия днесь Дави́д исполня́ется Боже́ственный, / Ио́сиф же хвале́ние со Иа́ковом прино́сит: / вене́ц бо сро́дством Христо́вым прие́мше, ра́дуются, / и неизрече́нно на земли́ Ро́ждшагося воспева́ют, и вопию́т: / Ще́дре, спаса́й Тебе́ чту́щия.

27. СВЯТАГО АПОСТОЛА, ПЕРВОМУЧЕНИКА И АРХИДИАКОНА СТЕФАНА (34)

Тропарь, глас 4:

По́двигом до́брым подвиза́лся еси́, / первому́чениче Христо́в, и апо́столе, и архидиа́коне Стефа́не, / и мучи́телей обличи́л еси́ нече́стие, / ка́мением бо побие́н от рук беззако́нных, / вене́ц от я́же свы́ше десни́цы прия́л еси́ / и к Бо́гу взыва́л еси́, вопия́: / Го́споди, не поста́ви им греха́ сего́.

Иный тропарь, глас 4:

Ца́рским венце́м венча́ся / твой верх от страда́ний, / я́же претерпе́л еси́ по Христе́ Бо́зе, / му́чеников первострада́льче Стефа́не, / ты бо, иуде́йское обличи́вый неи́стовство, / ви́дел еси́ твоего́ Спа́са одесну́ю Отца́: / Того́ у́бо моли́ о душа́х на́ших.

Кондак, глас 3:

Влады́ка вчера́ нам пло́тию прихожда́ше, / и раб днесь от пло́ти исхожда́ше, / вчера́ Ца́рствуяй пло́тию роди́ся, / днесь раб ка́мением побива́ется; / того́ ра́ди и скончава́ется / первому́ченик и Боже́ственный Стефа́н.

ЯНВАРЬ

1. ОБРЕЗАНИЕ ГОСПОДА БОГА И СПАСА НАШЕГО ИИСУСА ХРИСТА. СВЯТИТЕЛЯ ВАСИЛИЯ ВЕЛИКАГО, АРХИЕПИСКОПА КЕСАРИИ КАППАДОКИЙСКИЯ (379)

Тропарь праздника, глас тойже:

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче.

Тропарь святаго, глас 1:

Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.

Кондак праздника, глас 3:

Всех Госпо́дь обре́зание терпи́т / и челове́ческая прегреше́ния, я́ко Благ, обре́зует, / дае́т спасе́ние днесь ми́ру. / Ра́дуется же в Вы́шних и Созда́телев иера́рх, / и светоно́сный, Боже́ственный таи́нник Христо́в Васи́лий.

Кондак святаго, глас 4:

Яви́лся еси́ основа́ние непоколеби́мое Це́ркве, / подая́ всем некрадо́мое госпо́дьство челове́ком, / запечатле́я твои́ми веле́ньми, / небоявле́нне Васи́лие преподо́бне.

2. ПРЕДПРАЗДНСТВО ПРОСВЕЩЕНИЯ

Тропарь, глас 4:

Гото́вися, Завуло́не, / и красу́йся, Неффали́ме, / Иорда́не реко́, ста́ни, / подыми́, взыгра́я, крести́тися гряду́ща Влады́ку. / Весели́ся, Ада́ме с прама́терию, / не кры́йта себе́, я́коже в раи́ пре́жде, / и́бо, на́ги ви́дев вы, яви́ся, / да облече́т в пе́рвую оде́жду: / Христо́с яви́ся, всю тварь хотя́ обнови́ти.

Кондак предпразднства, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Иный кондак предпразднства, глас 2:

Всех, Христе́, Благоутро́бне, отъе́мляй прегреше́ний мно́жество / ми́лости ра́ди безме́рныя, / Иорда́нскими вода́ми крести́тися гряде́ши, я́ко Челове́к, / оде́ждею мя одева́я, / сла́вы дре́вния обнаже́нна лю́те.

ПРЕПОДОБНАГО СЕРАФИМА САРОВСКАГО (ПРЕСТАВЛЕНИЕ 1833; ВТОРОЕ ОБРЕТЕНИЕ МОЩЕЙ, 1991)

Тропарь, глас 4:

От ю́ности Христа́ возлюби́л еси́, блаже́нне, / и, Тому́ Еди́ному рабо́тати пла́менне вожделе́в, / непреста́нною моли́твою и трудо́м в пусты́ни подвиза́лся еси́, / умиле́нным же се́рдцем любо́вь Христо́ву стяжа́в, / избра́нник возлю́блен Бо́жия Ма́тере яви́лся еси́. / Сего́ ра́ди вопие́м ти: / спаса́й нас моли́твами твои́ми, Серафи́ме, преподо́бне о́тче наш.

Кондак, глас 2:

Ми́ра красоту́ и я́же в нем тле́нная оста́вив, преподо́бне, / в Саро́вскую оби́тель всели́лся еси́ / и, та́мо а́нгельски пожи́в, / мно́гим путь был еси́ ко спасе́нию, / сего́ ра́ди и Христо́с тебе́, о́тче Серафи́ме, просла́ви / и да́ром исцеле́ний и чуде́с обогати́. / Те́мже вопие́м ти: / ра́дуйся, Серафи́ме, преподо́бне о́тче наш.

5. ПРЕДПРАЗДНСТВО ПРОСВЕЩЕНИЯ

Тропарь, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.

Кондак предпразднства, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

6. СВЯТОЕ БОГОЯВЛЕНИЕ. КРЕЩЕНИЕ ГОСПОДА БОГА И СПАСА НАШЕГО ИИСУСА ХРИСТА

Тропарь, глас 1:

Во Иoрда́не креща́ющуся Тебе́, Го́споди, / Тро́йческое яви́ся поклоне́ние: / Роди́телев бо глас свиде́тельствоваше Тебе́, / возлю́бленнаго Тя Сы́на имену́я, / и Дух в ви́де голуби́не / изве́ствоваше словесе́ утвержде́ние. / Явле́йся, Христе́ Бо́же, / и мир просвеще́й, сла́ва Тебе́.

Кондак, глас 4:

Яви́лся еси́ днесь вселе́нней, / и свет Твой, Го́споди, зна́менася на нас, / в ра́зуме пою́щих Тя: / прише́л еси́ и яви́лся еси́, / Свет Непристу́пный.

7. СОБОР СВЯТАГО ПРОРОКА, ПРЕДТЕЧИ И КРЕСТИТЕЛЯ ГОСПОДНЯ ИОАННА

Тропарь, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стину и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже, за и́стину пострада́в, ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра / и подаю́щаго нам ве́лию ми́лость.

Кондак, глас 6:

Плотска́го Твоего́ прише́ствия убоя́вся, / Иорда́н стра́хом возвраща́шеся, / проро́ческое же служе́ние исполня́я, / Иоа́нн тре́петом спря́ташеся, / А́нгельския чи́ни ужаса́хуся, / зря́ще Тя, во струя́х пло́тию креща́ема; / и вси, су́щии во тьме, озаря́хуся, / воспева́юще Тя, я́вльшагося и просвети́вшаго вся.

9. СВЯТИТЕЛЯ ФИЛИППА, МИТРОПОЛИТА МОСКОВСКАГО И ВСЕЯ РОССИИ, ЧУДОТВОРЦА (1569)

Тропарь, глас 8:

Первопресто́льников прее́мниче, / сто́лпе Правосла́вия, и́стины побо́рниче, / но́вый испове́дниче, святи́телю Фили́ппе, / положи́вый ду́шу за па́ству твою́, / те́мже, я́ко име́я дерзнове́ние ко Христу́, / моли́ за град же и лю́ди, / чту́щия досто́йно святу́ю па́мять твою́.

Кондак, глас 3:

Правосла́вия наста́вника и и́стины провозве́стника, / Златоу́стаго ревни́теля, / Росси́йскаго свети́льника, Фили́ппа прему́драго восхва́лим, / пи́щею слове́с свои́х разу́мно ча́да своя́ пита́юща, / той бо язы́ком хвале́ние поя́ше, / устна́ма же пе́ние веща́ше, / я́ко таи́нник Бо́жия благода́ти.

11. ПРЕПОДОБНАГО ФЕОДОСИЯ ВЕЛИКАГО, ОБЩИХ ЖИТИЙ НАЧАЛЬНИКА (529)

Тропарь, глас 8:

Слез твои́х тече́ньми пусты́ни безпло́дное возде́лал еси́, / и и́же из глубины́ воздыха́ньми во сто трудо́в уплодоноси́л еси́, / и был еси́ свети́льник вселе́нней, сия́я чудесы́, Феодо́сие о́тче наш, / моли́ Христа́ Бо́га, спасти́ся душа́м на́шим.

Кондак, глас 8:

Насажде́н во дво́рех Го́спода твоего́, / преподо́бными твои́ми доброде́тельми красно́ процве́л еси́ / и умно́жил еси́ ча́да твоя́ в пусты́ни, / слез твои́х ту́чами напая́емая, / стадонача́льниче Бо́жий Боже́ственных дворо́в. / Те́мже зове́м: ра́дуйся, о́тче Феодо́сие.

12. СВЯТИТЕЛЯ САВВЫ I, АРХИЕПИСКОПА СЕРБСКАГО (1237)

Тропарь, глас 8:

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / архиере́ев Богодухнове́нное удобре́ние, Са́вво прему́дре, / уче́ньми твои́ми вся просвети́л еси́, цевни́це духо́вная. / Моли́ Христа́ Бо́га спасти́ся душа́м на́шим.

Кондак, глас 8:

Я́ко первосвяти́теля вели́каго, и Апо́столов соо́бщника, / Це́рковь прославля́ет тя, люде́й твои́х, преподо́бне, / но я́ко име́я дерзнове́ние ко Христу́ Бо́гу, / моли́твами твои́ми от вся́ких нас бед спаса́й, да зове́м ти: / ра́дуйся, о́тче Са́вво Богому́дре.

14. СВЯТЫЯ РАВНОАПОСТОЛЬНЫЯ НИНЫ, ПРОСВЕТИТЕЛЬНИЦЫ ГРУЗИИ (335)

Тропарь, глас 4:

Сло́ва Бо́жия служи́тельнице, / во апо́стольстей про́поведи первозва́нному Андре́ю / и про́чим апо́столом подража́вшая, / просвети́тельнице Иве́рии и Ду́ха Свята́го цевни́це, / свята́я равноапо́стольная Ни́но, / моли́ Христа́ Бо́га / спасти́ся душа́м на́шим.

Кондак, глас 2:

Прииди́те днесь вси, / воспои́м избра́нную от Христа́ / равноапо́стольную пропове́дницу Бо́жия сло́ва, / му́друю благове́стницу, / лю́ди Картали́нии приве́дшу на путь живота́ и и́стины, / Богома́тере учени́цу, / усе́рдную засту́пницу и неусыпа́ющую храни́тельницу на́шу, / Ни́ну прехва́льную.

17. ПРЕПОДОБНАГО АНТОНИЯ ВЕЛИКАГО (356)

Тропарь, глас 4:

Ревни́теля Илию́ нра́вы подража́я, / Крести́телю пра́выми стезя́ми после́дуя, / о́тче Анто́ние, / пусты́ни был еси́ жи́тель / и вселе́нную утверди́л еси́ моли́твами твои́ми. / Те́мже моли́ Христа́ Бо́га / спасти́ся душа́м на́шим.

Кондак, глас 2:

Жите́йския молвы́ отри́нув, / безмо́лвно житие́ сконча́л еси́, / Крести́теля подража́яй вся́ким о́бразом, преподо́бнейший, / с ним у́бо тя почита́ем, / отце́в нача́льниче, Анто́ние.

18. СВЯТИТЕЛЕЙ АФАНАСИЯ (373) И КИРИЛЛА (444), АРХИЕПИСКОПОВ АЛЕКСАНДРИЙСКИХ

Тропарь, глас 3:

Де́лы возсия́вше Правосла́вия, / все погаси́вше злосла́вие, / победи́телие победоно́сцы бы́сте, / благоче́стием вся обогати́вше, / Це́рковь вельми́ украси́вше, / досто́йно обрето́сте Христа́ Бо́га, / да́рующа нам ве́лию ми́лость.

Кондак, глас 4:

Священнонача́льницы велича́йшии благоче́стия, / и до́блии побо́рницы Це́ркве Христо́вы, / вся соблюди́те, пою́щия: / спаси́, Ще́дре, / ве́рою чту́щия Тя.

20. ПРЕПОДОБНАГО ЕВФИМИЯ ВЕЛИКАГО (473)

Тропарь, глас 4:

Весели́ся, пусты́ня неражда́ющая, / благоду́шствуй, неболя́щая, / я́ко умно́жи тебе́ ча́да муж жела́ний духо́вных, / благоче́стием насади́в, / воздержа́нием воспита́в доброде́телей в соверше́нство. / Того́ моли́твами, Христе́ Бо́же, / умири́ живо́т наш.

Кондак, глас 8:

В честне́м рождестве́ твое́м ра́дость тварь обре́те, / и в Боже́ственней па́мяти твое́й, преподо́бне, / благоду́шие прия́т мно́гих твои́х чуде́с, / от ни́хже пода́ждь бога́тно в ду́ши на́ша и очи́сти грехо́в скве́рны, / я́ко да пое́м: аллилу́ия.

21. ПРЕПОДОБНАГО МАКСИМА ИСПОВЕДНИКА (662)

Тропарь, глас 8:

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / мона́шествующих Богодухнове́нное удобре́ние, / Макси́ме прему́дре, / уче́ньми твои́ми вся просвети́л еси́, / цевни́це духо́вная, / моли́ Христа́ Бо́га спасти́ся душа́м на́шим.

Кондак, глас 6:

Свет Трисия́нный, все́льшийся в ду́шу твою́, / сосу́д избра́н показа́ тя, всеблаже́нне, / явля́юща Боже́ственная конце́м, / неудобопости́жных разуме́ний ты сказу́яй, блаже́нне, / и Тро́ицу всем, Макси́ме, возпропове́дуяй я́сно, / Пресу́щную, Безнача́льную.

ПРЕПОДОБНАГО МАКСИМА ГРЕКА (1556)

Тропарь, глас 8:

Заре́ю Ду́ха облиста́емь, / вити́йствующих богому́дренно сподо́бился еси́ разуме́ния, / неве́дением омраче́нная сердца́ челове́ков све́том благоче́стия просвеща́я, / пресве́тел яви́лся еси́ Правосла́вия свети́льник, Макси́ме преподо́бне, / отону́дуже ре́вности ра́ди Всеви́дящаго / оте́чества чужд и стра́нен, Росси́йския страны́ был еси́ пресе́льник, / страда́ния темни́ц и заточе́ния от самодержа́внаго претерпе́в, / десни́цею Вы́шняго венча́ешися и чудоде́йствуеши пресла́вная. / И о нас хода́тай бу́ди непрело́жен, / чту́щих любо́вию святу́ю па́мять твою́.

Кондак, глас 8:

Богодухнове́нным Писа́нием и богосло́вия пропове́данием / неве́рствующих суему́дрие обличи́л еси́, всебога́те, / па́че же, в Правосла́вии исправля́я, на стезю́ и́стиннаго позна́ния наста́вил еси́, / я́коже свире́ль богогла́сная, услажда́я слы́шащих ра́зумы, / непреста́нно весели́ши, Макси́ме досточу́дне, сего́ ра́ди мо́лим тя: / моли́ Христа́ Бо́га грехо́в оставле́ние низпосла́ти / ве́рою пою́щим всесвято́е твое́ успе́ние, Макси́ме, о́тче наш.

25. СВЯТИТЕЛЯ ГРИГОРИЯ БОГОСЛОВА, АРХИЕПИСКОПА КОНСТАНТИНОГРАДСКАГО (389)

Тропарь, глас 1:

Па́стырская свире́ль Богосло́вия твоего́ / ри́торов победи́ трубы́, / я́коже бо глубины́ ду́ха изыска́вшу, / и добро́ты веща́ния приложи́шася тебе́. / Но моли́ Христа́ Бо́га, о́тче Григо́рие, / спасти́ся душа́м на́шим.

Кондак, глас 3:

Богосло́вным язы́ком твои́м сплете́ния ри́торская разруши́вый, сла́вне, / правосла́вия оде́ждею, свы́ше истка́нною, Це́рковь украси́л еси́, / ю́же и нося́щи, с на́ми зове́т, твои́ми ча́ды: / ра́дуйся, о́тче, / Богосло́вия у́ме кра́йнейший.

27. СВЯТИТЕЛЯ ИОАННА ЗЛАТОУСТАГО, АРХИЕПИСКОПА КОНСТАНТИНОГРАДСКАГО (ПРЕНЕСЕНИЕ МОЩЕЙ, 438)

Тропарь, глас 8:

Уст твои́х, я́коже све́тлость огня́ возсия́вши, благода́ть / вселе́нную просвети́: / не сребролю́бия ми́рови сокро́вища сниска́, / высоту́ нам смиренному́дрия показа́, / но, твои́ми словесы́ наказу́я, о́тче Иоа́нне Златоу́сте, / моли́ Сло́ва Христа́ Бо́га спасти́ся душа́м на́шим.

Кондак, глас 1:

Возвесели́ся та́инственно честна́я Це́рковь / возвраще́нием честны́х твои́х моще́й, / и, сия́ сокры́вши, я́ко зла́то многоце́нное, / пою́щим тя неоску́дно подава́ет / моли́твами твои́ми исцеле́ний благода́ть, / Иоа́нне Златоу́сте.

29. СВЯТАГО СВЯЩЕННОМУЧЕНИКА ИГНАТИЯ БОГОНОСЦА (ПРЕНЕСЕНИЕ МОЩЕЙ, 108; 438)

Тропарь, глас 4:

И нра́вом прича́стник, / и престо́лом наме́стник апо́столом быв, / дея́ние обре́л еси́, Богодухнове́нне, / в виде́ния восхо́д, / сего́ ра́ди сло́во и́стины исправля́я, / и ве́ры ра́ди пострада́л еси́ да́же до кро́ве, / священному́чениче Игна́тие. / Моли́ Христа́ Бо́га / спасти́ся душа́м на́шим.

Кондак, глас 4:

От восто́ка днесь возсия́вый / и тварь всю просвети́вый уче́ньми, / му́ченичеством украси́ся, Богоно́сный и Боже́ственный Игна́тий.

30. СОБОР ВСЕЛЕНСКИХ УЧИТЕЛЕЙ И СВЯТИТЕЛЕЙ ВАСИЛИЯ ВЕЛИКАГО (379), ГРИГОРИЯ БОГОСЛОВА (389) И ИОАННА ЗЛАТОУСТАГО (407) (1084)

Тропарь, глас 4:

Я́ко апо́столов единонра́внии / и вселе́нныя учи́телие, / Влады́ку всех моли́те / мир вселе́нней дарова́ти / и душа́м на́шим ве́лию ми́лость.

Кондак, глас 2:

Свяще́нныя и боговеща́нныя пропове́дники, / верх учи́телей, Го́споди, / прия́л еси́ в наслажде́ние благи́х Твои́х и упокое́ние: / труды́ бо о́нех и смерть прия́л еси́ па́че вся́каго всепло́дия, / Еди́не Прославля́яй святы́я Твоя́.

31. СВЯТЫХ ЧУДОТВОРЦЕВ И БЕЗСРЕБРЕНИКОВ КИРА И ИОАННА (311)

Тропарь, глас 5:

Чудеса́ святы́х Твои́х му́ченик / сте́ну необори́му нам дарова́вый, Христе́ Бо́же, / тех моли́твами сове́ты язы́ков разори́, / Це́рковь Святу́ю укрепи́, / я́ко еди́н Благ и Человеколю́бец.

Кондак, глас 3:

От Боже́ственныя благода́ти дар чуде́с прие́мше святи́и, / чудоде́йствуете непреста́нно, / вся на́ша стра́сти рукоде́йством секу́ще неви́димым, / Ки́ре Богому́дре со Иоа́нном сла́вным: / вы бо Боже́ственнии вра́чеве есте́.

ФЕВРАЛЬ

1. ПРЕДПРАЗДНСТВО СРЕТЕНИЯ ГОСПОДА БОГА И СПАСА НАШЕГО ИИСУСА ХРИСТА

Тропарь, глас 1:

Небе́сный лик Небе́сных А́нгел, / прини́к на зе́млю, прише́дше зрит я́ко Младе́нца, / носи́ма к хра́му, Перворожде́нна всея́ тва́ри от Ма́тере Неискусому́жныя, / предпра́зднственную у́бо с на́ми пою́т песнь, ра́дующеся.

Кондак, глас 6:

Со Отце́м Сло́во сый неви́димо, / ны́не у́бо ви́дим есть пло́тию: / неизрече́нно от Де́вы роди́ся / и на ру́ку ста́рчу дае́тся святи́телю. / Поклони́мся Тому́, / и́стинному Бо́гу на́шему.

2. СРЕТЕНИЕ ГОСПОДА БОГА И СПАСА НАШЕГО ИИСУСА ХРИСТА

Тропарь, глас 1:

Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние.

Кондак, глас 1:

Утро́бу Деви́чу освяти́вый Рождество́м Твои́м / и ру́це Симео́не благослови́вый, / я́коже подоба́ше, предвари́в, / и ны́не спасл еси́ нас, Христе́ Бо́же, / но умири́ во бране́х жи́тельство / и укрепи́ лю́ди, и́хже возлюби́л еси́, Еди́не Человеколю́бче.

12. СВЯТИТЕЛЯ АЛЕКСИЯ МИТРОПОЛИТА, МОСКОВСКАГО И ВСЕЯ РУСИ ЧУДОТВОРЦА (1378)

Тропарь, глас 8:

Я́ко апо́столом сопресто́льна, / и врача́ предо́бра, и служи́теля благоприя́тна, / к ра́це твое́й честне́й притека́юще, святи́телю Алекси́е, богому́дре чудотво́рче, / соше́дшеся, любо́вию в па́мять твою́ све́тло пра́зднуем, / в пе́снех и пе́ниих ра́дующеся и Христа́ сла́вяще, / такову́ю благода́ть тебе́ дарова́вшаго исцеле́ний / и гра́ду твоему́ вели́кое утвержде́ние.

Кондак, глас 8:

Боже́ственнаго и пречестна́го святи́теля Христо́ва, / но́ваго чудотво́рца Алекси́я, / ве́рно вси пою́ще, лю́дие, любо́вию да ублажи́м, я́ко па́стыря вели́каго, / служи́теля же и учи́теля прему́дра земли́ Росси́йстей. / Днесь, в па́мять его́ прите́кше, ра́достно возопие́м песнь богоно́сному: / я́ко име́я дерзнове́ние к Бо́гу, / многообра́зных нас изба́ви обстоя́ний, да зове́м ти: / ра́дуйся, утвержде́ние гра́ду на́шему.

17. СВЯЩЕННОМУЧЕНИКА ЕРМОГЕНА, ПАТРИАРХА МОСКОВСКАГО И ВСЕЯ РУСИ (1612)

Тропарь, глас 4:

Росси́йския земли́ первопресто́льниче / и неусы́пный о ней к Бо́гу моли́твенниче! / За ве́ру Христо́ву и па́ству твою́ ду́шу свою́ положи́в, / стра́ну на́шу от нече́стия изба́вил еси́. / Те́мже вопие́м ти: / спаса́й нас моли́твами твои́ми, / священному́чениче Ермоге́не, о́тче наш.

Кондак, глас 6:

Темни́цею и гла́дом изнуря́емь, / да́же до сме́рти ве́рен пребы́л еси́, блаже́нне Ермоге́не, / малоду́шие от серде́ц люде́й твои́х отгоня́я / и на о́бщий по́двиг вся призыва́я. / Те́мже и нечести́вых мяте́ж низложи́л еси́ и страну́ на́шу утверди́л еси́, / да вси зове́м ти: / ра́дуйся, засту́пниче Росси́йския земли́.

24. СВЯТАГО ПРОРОКА ПРЕДТЕЧИ И КРЕСТИТЕЛЯ ГОСПОДНЯ ИОАННА (ПЕРВОЕ [IV] И ВТОРОЕ [452] ОБРЕТЕНИЕ ЧЕСТНОЙ ГЛАВЫ)

Тропарь, глас 4:

От земли́ возсия́вши, Предте́чева глава́ / лучи́ испуща́ет нетле́ния ве́рным исцеле́ний, / свы́ше собира́ет мно́жество А́нгел, / до́ле же созыва́ет челове́ческий род / единогла́сную возсыла́ти сла́ву Христу́ Бо́гу.

Кондак, глас 6:

Проро́че Бо́жий и Предте́че благода́ти, / главу́ твою́, я́ко ши́пок свяще́ннейший, от земли́ обре́тше, / исцеле́ния всегда́ прие́млем, / и́бо па́ки, я́коже пре́жде, / в ми́ре пропове́дуеши покая́ние.

МАРТ

9. СВЯТЫХ СОРОКА МУЧЕНИКОВ СЕВАСТИЙСКИХ (ОК. 320)

Тропарь, глас 1:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Кондак, глас 6:

Все во́инство ми́ра оста́вльше, / на Небесе́х Влады́це прилепи́стеся, / страстоте́рпцы Госпо́дни четы́редесять, / сквозе́ огнь бо и во́ду проше́дше, блаже́ннии, / досто́йно восприя́сте сла́ву с Небе́с / и венце́в мно́жество.

12. СВЯТИТЕЛЯ ГРИГОРИЯ ДВОЕСЛОВА, ПАПЫ РИМСКАГО (604)

Тропарь, глас 4:

И́же от Бо́га свы́ше Боже́ственную благода́ть восприе́мь, / сла́вне Григо́рие, / и Того́ си́лою укрепля́емь, / ева́нгельски ше́ствовати изво́лил еси́. / Отону́дуже у Христа́ возме́здие трудо́в прия́л еси́, всеблаже́нне, / Его́же моли́, / да спасе́т ду́ши на́ша.

Кондак, глас 3:

Подобонача́льник показа́лся еси́ Нача́льника па́стырем Христа́, / и́ноков чреды́, о́тче Григо́рие, / ко огра́де Небе́сней наставля́я, / и отту́ду научи́л еси́ ста́до Христо́во за́поведем Его́, / ны́не же с ни́ми ра́дуешися и лику́еши в Небе́сных кро́вех.

14. ПРЕПОДОБНАГО ВЕНЕДИКТА НУРСИЙСКАГО (543)

Тропарь, глас 1:

Пусты́нный жи́тель, и в теле́си А́нгел, / и чудотво́рец яви́лся еси́, богоно́се о́тче наш Венеди́кте, / посто́м, бде́нием, моли́твою Небе́сная дарова́ния прии́м, / исцеля́еши неду́жныя и ду́ши ве́рою притека́ющих ти. / Сла́ва Да́вшему ти кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Кондак, глас 6:

Благода́тию Бо́жиею обогати́лся еси́, / де́лы же извести́л еси́ зва́ние, / и яви́лся еси́, Венеди́кте, уго́дниче Христа́ Бо́га, / в моли́твах и посте́х дарова́ний Бо́жия Ду́ха испо́лнен, / и был еси́ неду́жным исцели́тель, / и прогони́тель враго́м, / и засту́пник ско́рый душа́м на́шим.

ПРАЗДНЕСТВО ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ ИКОНЫ ЕЯ, ИМЕНУЕМЫЯ «ФЕОДОРОВСКАЯ» (1613)

Тропарь, глас 4:

Прише́ствием честны́я Твоея́ ико́ны, Богоотрокови́це, / обра́дованный днесь Богохрани́мый град Кострома́, / я́коже дре́вний Изра́иль к киво́ту Заве́та, / притека́ет ко изображе́нию лица́ Твоего́ / и воплоти́вшагося от Тебе́ Бо́га на́шего, / да Твои́м Ма́терним к Нему́ предста́тельством / при́сно хода́тайствуеши всем, / под сень кро́ва Твоего́ прибега́ющим, / мир и ве́лию ми́лость.

Кондак, глас 8:

Благода́рственная принося́ще Ти, раби́ Твои́, Богороди́тельнице, о всех, / и́миже благоде́яла еси́ гра́ду на́шему, / из глубины́ души́ взыва́ем к Тебе́ и ми́ли ся де́ем: / не преста́ни, Влады́чице, / Ма́терними к Сы́ну Твоему́ и Бо́гу на́шему моли́твами / подава́ти вся блага́я и спаси́тельная всем, / ве́рою и любо́вию вопию́щим Ти: / ра́дуйся, Де́во, христиа́н похвало́.

24. ПРЕДПРАЗДНСТВО БЛАГОВЕЩЕНИЯ ПРЕСВЯТЫЯ БОГОРОДИЦЫ

Тропарь, глас 4:

Днесь всеми́рныя ра́дости нача́тки / предпра́зднственное воспе́ти повелева́ют: / се бо Гаврии́л прихо́дит, / Де́ве нося́ благове́стие, / и к Ней вопие́т: / ра́дуйся, Благода́тная, / Госпо́дь с Тобо́ю.

Кондак, глас 8:

Всем земны́м нача́ло спасе́ния на́шего Ты еси́, Богоро́дице Де́во, / Бо́жий бо служи́тель с Небе́с по́слан предста́ти Тебе́, / вели́кий чинонача́льник Гаврии́л, / ра́дость обра́дованную Ти принесе́. / Тем вси зове́м Ти: / ра́дуйся, Неве́сто Неневе́стная.

25. БЛАГОВЕЩЕНИЕ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю.

Кондак, глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

АПРЕЛЬ

23. СВЯТАГО ВЕЛИКОМУЧЕНИКА И ПОБЕДОНОСЦА ГЕОРГИЯ (303)

Тропарь, глас 4:

Я́ко пле́нных свободи́тель / и ни́щих защи́титель, / немощству́ющих врач, / правосла́вных побо́рниче, / победоно́сче великому́чениче Гео́ргие, / моли́ Христа́ Бо́га / спасти́ся душа́м на́шим.

Кондак, глас 4:

Возде́лан от Бо́га / показа́лся еси́ благоче́стия де́латель честне́йший, / доброде́телей рукоя́ти собра́в себе́: / се́яв бо в слеза́х, весе́лием жне́ши, / страда́льчествовав же кро́вию, Христа́ прия́л еси́, / и моли́твами, свя́те, твои́ми всем подае́ши / прегреше́ний проще́ние.

25. СВЯТАГО АПОСТОЛА И ЕВАНГЕЛИСТА МАРКА (63)

Тропарь, глас 3:

Апо́столе святы́й и Евангели́сте Ма́рко, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 2:

С высоты́ прии́м благода́ть Ду́ха, / ри́торская плете́ния разруши́л еси́, апо́столе, / и, язы́ки вся улови́в, Ма́рко всесла́вне, / твоему́ Влады́це приве́л еси́, / Боже́ственное пропове́дав Ева́нгелие.

26. СВЯТИТЕЛЯ СТЕФАНА, ЕПИСКОПА ВЕЛИКОПЕРМСКАГО (1396)

Тропарь, глас 4:

Боже́ственным жела́нием / от ю́наго во́зраста, Стефа́не прему́дре, разже́гся, / яре́м Христо́в взял еси́ / и люде́й олядене́вшая дре́вле неве́рием сердца́, / Боже́ственное се́мя в них се́яв, / ева́нгельски духо́вне породи́л еси́. / Те́мже пресла́вную твою́ па́мять почита́юще, мо́лим тя: / моли́, Его́же пропове́дал еси́, / да спасе́т ду́ши на́ша.

Кондак, глас 8:

Самозва́нен не и́щущим тебе́, святи́телю, обре́лся еси́, / лю́ди от и́дольския ле́сти свободи́в, / ко Христо́ве ве́ре приве́л еси́ / и волхва́ пансо́тника посрами́л еси́, / те́мже и пе́рвый епи́скоп и учи́тель Пе́рми был еси́. / Сего́ ра́ди духо́вная твоя́ ча́да, / я́ко тобо́ю изба́вльшеся от и́дол, благода́рная тебе́ возопие́м: / ра́дуйся, Стефа́не, учи́телю прему́дрый.

30. СВЯТАГО АПОСТОЛА ИАКОВА ЗЕВЕДЕЕВА (44)

Тропарь, глас 3:

Апо́столе святы́й Иа́кове, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 2:

Глас Боже́ственный слы́шав призыва́ющ тя, / любо́вь отца́ презре́л еси́ / и прите́кл еси́ ко Христу́, Иа́кове, с сро́дником твои́м, сла́вне, / с ни́мже сподо́бился еси́ ви́дети / Госпо́дне Боже́ственное преображе́ние.

СВЯТИТЕЛЯ ИГНАТИЯ БРЯНЧАНИНОВА, ЕПИСКОПА КАВКАЗСКАГО (1867)

Тропарь, глас 8:

Правосла́вия побо́рниче, / покая́ния и моли́твы де́лателю и учи́телю изря́дный, / архиере́ев Богодухнове́нное украше́ние, / мона́шествующих сла́во и похвало́: / писа́нии твои́ми вся ны уцелому́дрил еси́. / Цевни́це духо́вная, Игна́тие богому́дре, / моли́ Сло́ва Христа́ Бо́га, Его́же носи́л еси́ в се́рдце твое́м, / дарова́ти нам пре́жде конца́ покая́ние.

Кондак, глас 8:

А́ще и соверша́л еси́ стезю́ жития́ земна́го, святи́телю Игна́тие, / оба́че непреста́нно зрел еси́ зако́ны бытия́ ве́чнаго, / сему́ поуча́я ученики́ словесы́ мно́гими, / и́мже после́довати и нам, свя́тче, помоли́ся.

МАЙ

2. СВЯТИТЕЛЯ АФАНАСИЯ ВЕЛИКАГО, ПАТРИАРХА АЛЕКСАНДРИЙСКАГО (373)

Тропарь, глас 3:

Столп был еси́ Правосла́вия, / Боже́ственными догма́ты подтвержда́я Це́рковь, / священнонача́льниче Афана́сие: / Отцу́ бо Сы́на Единосу́щна пропове́дав, / посрами́л еси́ А́рия. / О́тче преподо́бне, / Христа́ Бо́га моли́ / дарова́ти нам ве́лию ми́лость.

Кондак, глас 2:

Правосла́вия насади́в уче́ния, / злосла́вия те́рния изсе́кл еси́, / умно́жив се́мя ве́ры одожде́нием Ду́ха, преподо́бне, / те́мже тя пое́м, Афана́сие.

СВЯТЫХ БЛАГОВЕРНЫХ РОССИЙСКИХ КНЯЗЕЙ МУЧЕНИКОВ И СТРАСТОТЕРПЦЕВ БОРИСА И ГЛЕБА (ВО СВЯТЕМ КРЕЩЕНИИ РОМАНА И ДАВИДА) (ПРЕНЕСЕНИЕ МОЩЕЙ, 1072 И 1115)

Тропарь, глас 4

Днесь церко́вная разширя́ются не́дра, / прие́млющи бога́тство Бо́жия благода́ти, / веселя́тся ру́сстии собо́ри, / ви́дяще пресла́вная чудеса́, / я́же твори́те приходя́щим к вам ве́рою, / святи́и чудотво́рцы Бори́се и Гле́бе, / моли́те Христа́ Бо́га, да спасе́т ду́ши на́ша.

Ин тропарь, глас 2:

Пречестни́и, и целому́дреннии, и незло́бивии страстоте́рпцы, / Рома́не сла́вный и Дави́де чу́дный, / и́го бо Госпо́дне ева́нгельски на ра́мо взе́мше, / после́довасте Христу́ / и, крест Его́, я́ко ски́петр, в руку́ иму́ще, / врага́ бра́та и зла́го властолю́бца соодоле́сте, / и той ны́не в гее́не му́чится, / вы же ра́дуетеся, с ли́ки а́нгельскими предстоя́ще Святе́й Тро́ице, / моли́теся о держа́ве сро́дник ва́ших, благоуго́дней бы́ти, / и сыново́м ру́сским спасти́ся.

Кондак, глас 4:

Яви́ся днесь в стране́ Ру́сстей / благода́ть исцеле́ния / всем, к вам, блаже́ннии, / приходя́щим и вопию́щим: / ра́дуйтеся, засту́пницы те́плии.

3. ПРЕПОДОБНАГО ОТЦА НАШЕГО ФЕОДОСИЯ, ИГУМЕНА МОНАСТЫРЯ ПЕЧЕРСКАГО И НАЧАЛЬНИКА В РОССИЙСТЕЙ ЗЕМЛИ МОНАШЕСКАГО ОБЩАГО ЖИТИЯ (1074)

Тропарь, глас 8:

Возвы́сився на доброде́тель, измла́да возлюби́в мона́шеское житие́, / к жела́нию до́блественне дости́г, всели́лся еси́ в пеще́ру / и, украси́в житие́ твое́ поще́нием и све́тлостию, / в моли́твах, я́ко безпло́тен, пребыва́л еси́, / в Росси́йстей земли́, я́ко све́тлое свети́ло, просия́в, о́тче Феодо́сие, / моли́ Христа́ Бо́га спасти́ся душа́м на́шим.

Кондак, глас 3:

Звезду́ Росси́йскую днесь почти́м, / от восто́ка возсия́вшую, и на за́пад прише́дшую, / всю бо страну́ сию́ чудесы́ и добро́тою обогати́вшу и вся ны / соде́янием и благода́тию мона́шескаго уста́ва, / блаже́ннаго Феодо́сия.

8. СВЯТАГО СЛАВНАГО ВСЕХВАЛЬНАГО АПОСТОЛА И ЕВАНГЕЛИСТА ИОАННА БОГОСЛОВА (ОК. 98–117)

Тропарь, глас 2:

Апо́столе, Христу́ Бо́гу возлю́бленне, / ускори́ изба́вити лю́ди безотве́тны, / прие́млет тя припа́дающа / И́же па́дша на пе́рси прие́мый. / Его́же моли́, Богосло́ве, / и належа́щий о́блак язы́ков разгна́ти, / прося́ нам ми́ра и ве́лия ми́лости.

Кондак, глас 2:

Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, / я́ко Богосло́в и друг Христо́в.

9. СВЯТИТЕЛЯ НИКОЛАЯ ЧУДОТВОРЦА, АРХИЕПИСКОПА МИР ЛИКИЙСКИХ (ПРЕНЕСЕНИЕ МОЩЕЙ, 1087)

Тропарь, глас 4:

Приспе́ день све́тлаго торжества́, / град Ба́рский ра́дуется, / и с ним вселе́нная вся ликовству́ет / пе́сньми и пе́ньми духо́вными: / днесь бо свяще́нное торжество́, / в пренесе́ние честны́х и многоцеле́бных моще́й / святи́теля и чудотво́рца Никола́я, / я́коже со́лнце незаходи́мое, возсия́ светоза́рными луча́ми, / разгоня́я тьму искуше́ний же и бед / от вопию́щих ве́рно: / спаса́й нас, я́ко предста́тель наш, вели́кий Нико́лае.

Кондак, глас 3:

Взы́де, я́ко звезда́, от восто́ка до за́пада / твоя́ мо́щи, святи́телю Нико́лае, / мо́ре же освяти́ся ше́ствием твои́м, / и град Ба́рский прие́млет тобо́ю благода́ть: / нас бо де́ля яви́лся еси́ чудотво́рец изя́щный, / преди́вный и ми́лостивый.

10. СВЯТАГО АПОСТОЛА СИМОНА ЗИЛОТА (I)

Тропарь, глас 3:

Апо́столе святы́й Си́моне, / моли́ Ми́лостивого Бо́га, / да прегреше́ний оставле́ние / пода́ст душа́м на́шим.

Кондак, глас 2:

Изве́стно прему́дрости уче́ния в душа́х благоче́ствующих поло́жшаго / во хвале́нии ублажи́м, я́ко богоглаго́ливаго, вси Си́мона: / престо́лу бо сла́вы ны́не предстои́т и со Безпло́тными весели́тся, / моля́ся непреста́нно о всех нас.

11. СВЯТЫХ РАВНОАПОСТОЛЬНЫХ МЕФОДИЯ (885) И КИРИЛЛА (869), УЧИТЕЛЕЙ СЛОВЕНСКИХ

Тропарь, глас 4:

Я́ко апо́столом единонра́внии и слове́нских стран учи́телие, / Кири́лле и Мефо́дие богому́дрии, / Влады́ку всех моли́те, / вся язы́ки слове́нския утверди́ти в Правосла́вии и единомы́слии, / умири́ти мир и спасти́ ду́ши на́ша.

Кондак, глас 3:

Свяще́нную дво́ицу просвети́телей на́ших почти́м, / Боже́ственных писа́ний преложе́нием исто́чник богопозна́ния нам источи́вших, / из него́же да́же додне́сь неоску́дно почерпа́юще, / ублажа́ем вас, Кири́лле и Мефо́дие, / Престо́лу Вы́шняго предстоя́щих / и те́пле моля́щихся о душа́х на́ших.

21 ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ ИКОНЫ ЕЯ, НАРИЦАЕМЫЯ «ВЛАДИМИРСКАЯ» (1521)

Тропарь, глас 4:

Днесь све́тло красу́ется сла́внейший град Москва́, / я́ко зарю́ со́лнечную, восприе́мши, Влады́чице, / чудотво́рную Твою́ ико́ну, / к не́йже ны́не мы притека́юще и моля́щеся Тебе́, взыва́ем си́це: / о пречу́дная Влады́чице Богоро́дице! / Моли́ся из Тебе́ воплоще́нному Христу́ Бо́гу на́шему, / да изба́вит град сей и вся гра́ды и страны́ христиа́нския / невреди́мы от всех наве́т вра́жиих / и спасе́т ду́ши на́ша, я́ко Милосе́рд.

Кондак, глас 8:

Взбра́нной Воево́де победи́тельная, / я́ко изба́вльшеся от злых / прише́ствием Твоего́ честна́го о́браза, Влады́чице Богоро́дице, / све́тло сотворя́ем пра́зднество сре́тения Твоего́ и обы́чно зове́м Ти: / ра́дуйся, Неве́сто Неневе́стная.

СВЯТЫХ РАВНОАПОСТОЛЬНЫХ ЦАРЯ КОНСТАНТИНА (337) И МАТЕРЕ ЕГО ЦАРИЦЫ ЕЛЕНЫ (327)

Тропарь, глас 8:

Креста́ Твоего́ о́браз на Небеси́ ви́дев / и, я́коже Па́вел, зва́ние не от челове́к прие́м, / в царе́х апо́стол Твой, Го́споди, / Ца́рствующий град в руце́ Твое́й положи́, / его́же спаса́й всегда́ в ми́ре моли́твами Богоро́дицы, / еди́не Человеколю́бче.

Кондак, глас 3:

Константи́н днесь с ма́терию Еле́ною / Крест явля́ют, всечестно́е Дре́во, / всех у́бо иуде́ев посрамле́ние су́ще, / ору́жие же на проти́вныя ве́рных люде́й: / нас бо ра́ди яви́ся зна́мение ве́лие / и во бране́х гро́зное.

25. ТРЕТИЕ ОБРЕТЕНИЕ ЧЕСТНЫЯ ГЛАВЫ СВЯТАГО СЛАВНАГО ПРОРОКА ПРЕДТЕЧИ И КРЕСТИТЕЛЯ ИОАННА (ОК. 850)

Тропарь, глас 4:

Я́ко Боже́ственное сокро́вище, сокрове́нное в земли́, / Христо́с откры́ главу́ твою́ нам, проро́че и Предте́че. / Вси у́бо, соше́дшеся в сея́ обре́тение, / пе́сньми богоглаго́ливыми Спа́са воспои́м, / спаса́юща нас от тле́ния моли́твами твои́ми.

Кондак, глас 6:

Светоявле́нный и Боже́ственный в ми́ре столп, / со́лнца свети́льник, / Предте́ча, главу́ светоно́сную и Боже́ственную свою́ показа́вый в конце́х, / освяща́ет той ве́рно покланя́ющихся и взыва́ющих: / Христо́в прему́дрый Крести́телю, спаси́ всех нас.

ИЮНЬ

8. СВЯТАГО ВЕЛИКОМУЧЕНИКА ФЕОДОРА СТРАТИЛАТА (ПРЕНЕСЕНИЕ МОЩЕЙ, 319)

Тропарь, глас 4:

Воинствосло́вием и́стинным, страстоте́рпче, / Небе́сного Царя́ воево́да предо́брый был еси́, Фео́доре: / ору́жиями бо ве́ры ополчи́лся еси́ му́дренно, / и победи́л еси́ де́монов полки́, / и победоно́сный яви́лся еси́ страда́лец. / Те́мже тя ве́рою / при́сно ублажа́ем.

Кондак, глас 2:

Му́жеством души́ в ве́ру оболки́йся / и глаго́л Бо́жий, а́ки копие́, в ру́ку взем, врага́ победи́л еси́, / му́чеников преве́лий Фео́доре, / с ни́ми Христу́ Бо́гу моля́ся не преста́й о всех нас.

9. ПРЕПОДОБНАГО КИРИЛЛА, ИГУМЕНА БЕЛОЕЗЕРСКАГО (1427)

Тропарь, глас 1:

Я́ко крин, в пусты́ни дави́дски процве́л еси́, о́тче Кири́лле, / злостра́стия те́рние искореня́я, / и собра́л еси́ в ней учени́к мно́жество, / стра́хом Бо́жиим и уче́нием твои́м наставля́емых, / и́хже и до конца́, я́ко чадолюби́вый оте́ц, / не оста́вил еси́, посеща́я, да вси вопие́м: / сла́ва Да́вшему ти кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Кондак, глас 8:

Я́ко преоби́дев тле́нная и до́лу влеку́щая мудрова́ния, о́тче, / к Вы́шнему тече́нию ра́достно устреми́лся еси́, / и та́мо со святы́ми Пресвяте́й Тро́ице предстоя́, / моли́ от враг сохрани́тися ста́ду твоему́, / я́ко да, свято́е Твое́ успе́ние пра́зднующе, вопие́м: / ра́дуйся, преблаже́нне Кири́лле, о́тче наш.

11. СВЯТЫХ АПОСТОЛОВ ВАРФОЛОМЕЯ И ВАРНАВЫ (I)

Тропарь, глас 3:

Апо́столи святи́и, / моли́те Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак ап. Варнаве, глас 3:

Госпо́день был еси́ всеи́стинный служи́тель, / апо́столов же яви́лся еси́ седми́десятих пе́рвый, / озари́л еси́ и с Па́влом про́поведь твою́, / всем возвеща́яй Христа́ Спа́са, / сего́ ра́ди песнопе́нии / Боже́ственную па́мять твою́, Варна́во, соверша́ем.

Кондак ап. Варфоломею, глас 4:

Яви́лся еси́ вели́кое со́лнце вселе́нней / уче́ний сия́ньми и чуде́с стра́шных, / световодя́ почита́ющия тя, / Варфоломе́е, / Госпо́день апо́столе.

15. СВЯТИТЕЛЯ ИОНЫ, МИТРОПОЛИТА МОСКОВСКАГО И ВСЕЯ РУСИ (1461)

Тропарь, глас 4:

От ю́ности твоея́ весь сам себе́ Го́сподеви возложи́в, / в моли́твах, и труде́х, и в посте́х о́браз быв доброде́тели, / отону́дуже ви́дев Бог твое́ благо́е произволе́ние, / архиере́я тя и па́стыря Це́ркви Свое́й устроя́ет. / Те́мже и по преставле́нии честно́е те́ло твое́ / це́ло и нетле́нно соблюде́ся, / Ио́но святи́телю, / моли́ Христа́ Бо́га, / да спасе́т ду́ши на́ша.

Кондак, глас 8:

Я́ко от младе́нства Го́сподеви порабо́тив себе́, му́дре, / посто́м и бде́нием те́ло твое́ удруча́я, / те́мже сосу́д чист и дом Ду́ху Пресвято́му яви́лся еси́, / сего́ ра́ди и Це́ркви Свое́й тебе́ архиере́я и па́стыря устроя́ет, / ю́же до́бре упа́с, ко Го́споду отхо́диши, Его́же возлюби́л еси́. / Тем мо́лим тя: помина́й нас, ве́рою чту́щих святу́ю па́мять твою́, да вси зове́м ти: / ра́дуйся, о́тче Ио́но, святи́телю всечестны́й.

19. СВЯТАГО АПОСТОЛА ИУДЫ, БРАТА ГОСПОДНЯ (ОК. 80)

Тропарь, глас 1:

Христо́ва тя сро́дника, о Иу́да, ве́дуще и му́ченика тве́рда, / свяще́нно восхваля́ем, пре́лесть попра́вша и ве́ру соблю́дша. / Те́мже, днесь всесвяту́ю твою́ па́мять пра́зднующе, / грехо́в разреше́ние моли́твами твои́ми прие́млем.

Кондак, глас 2:

Тве́рдым умо́м избра́н учени́к ты яви́лся еси́ / и столп необори́м Це́ркве Христо́вы, / язы́ком пропове́дал еси́ сло́во Христо́во, / ве́ровати глаго́ля во Еди́но Божество́; / от Него́же просла́вився, прия́л еси́ дар исцеле́ний, / цели́ти неду́ги притека́ющих к тебе́, / апо́столе Иу́до всехва́льне.

23. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ СРЕТЕНИЯ ИКОНЫ ЕЯ, ИМЕНУЕМЫЯ «ВЛАДИМИРСКАЯ» (1480)

Тропарь, глас 4:

Днесь све́тло красу́ется сла́внейший град Москва́, / я́ко зарю́ со́лнечную, восприе́мши, Влады́чице, / чудотво́рную Твою́ ико́ну, / к не́йже ны́не мы притека́юще и моля́щеся Тебе́, взыва́ем си́це: / о пречу́дная Влады́чице Богоро́дице! / Моли́ся из Тебе́ воплоще́нному Христу́ Бо́гу на́шему, / да изба́вит град сей и вся гра́ды и страны́ христиа́нския / невреди́мы от всех наве́т вра́жиих / и спасе́т ду́ши на́ша, я́ко Милосе́рд.

Кондак, глас 8:

Взбра́нной Воево́де победи́тельная, / я́ко изба́вльшеся от злых / прише́ствием Твоего́ честна́го о́браза, Влады́чице Богоро́дице, / све́тло сотворя́ем пра́зднество сре́тения Твоего́ / и обы́чно зове́м Ти: / ра́дуйся, Неве́сто Неневе́стная.

24. РОЖДЕСТВО ЧЕСТНАГО СЛАВНАГО ПРОРОКА, ПРЕДТЕЧИ И КРЕСТИТЕЛЯ ГОСПОДНЯ ИОАННА

Тропарь, глас 4:

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, / и воплоще́ние Сы́на Бо́жия ми́рови пропове́дуется.

Кондак, глас 3:

Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.

26. ПРАЗДНОВАНИЕ В ЧЕСТЬ ЯВЛЕНИЯ ИКОНЫ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ, ИМЕНУЕМЫЯ «ТИХВИНСКАЯ» (1383)

Тропарь, глас 4:

Днесь, я́ко со́лнце пресве́тлое, / возсия́ нам на возду́се всечестна́я ико́на Твоя́, Влады́чице, / луча́ми ми́лости мир просвеща́ющи, / ю́же вели́кая Росси́я, / я́ко не́кий дар Боже́ственный свы́ше благогове́йне восприе́мши, / прославля́ет Тя, Богома́ти, всех Влады́чицу, / и от Тебе́ ро́ждшагося Христа́ Бо́га на́шего велича́ет ра́достно. / Ему́же моли́ся, о Госпоже́ Цари́це Богоро́дице, / да сохрани́т вся гра́ды и страны́ христиа́нския / невреди́мы от всех наве́т вра́жиих / и спасе́т ве́рою покланя́ющихся Его́ Боже́ственному / и Твоему́ пречи́стому о́бразу, / Де́во Неискусобра́чная.

Кондак, глас 8:

Притеце́м, лю́дие, к Де́вей Богоро́дице Цари́це, / благодаря́ще Христа́ Бо́га, / и, к Тоя́ чудотво́рней ико́не, уми́льно взира́ющи, припаде́м и возопие́м Ей: / о Влады́чице Мари́е, / присети́вше страну́ сию́ Твоего́ честна́го о́браза явле́нием чуде́сно, / спаса́й в ми́ре и благовре́менстве оте́чество на́ше и вся христиа́ны, / насле́дники показу́ющи Небе́сныя жи́зни, / Тебе́ бо ве́рно зове́м: / ра́дуйся, Де́во, ми́ра спасе́ние.

29. СВЯТЫХ СЛАВНЫХ И ВСЕХВАЛЬНЫХ И ПЕРВОВЕРХОВНЫХ АПОСТОЛ ПЕТРА И ПАВЛА (ОК. 67)

Тропарь, глас 4:

Апо́столов первопресто́льницы / и вселе́нныя учи́телие, / Влады́ку всех моли́те / мир вселе́нней дарова́ти / и душа́м на́шим ве́лию ми́лость.

Кондак, глас 2:

Тве́рдыя и Боговеща́нныя пропове́датели, / верх апо́столов Твои́х, Го́споди, / прия́л еси́ в наслажде́ние благи́х Твои́х и поко́й: / боле́зни бо о́нех и смерть прия́л еси́ па́че вся́каго всепло́дия, / Еди́не, све́дый серде́чная.

30. СОБОР СВЯТЫХ СЛАВНЫХ И ВСЕХВАЛЬНЫХ АПОСТОЛ ДВАНАДЕСЯТИ

Тропарь, глас 4:

Апо́столов первопресто́льницы / и вселе́нныя учи́телие, / Влады́ку всех моли́те / мир вселе́нней дарова́ти / и душа́м на́шим ве́лию ми́лость.

Кондак, глас 2:

Ка́мень Христо́с ка́меня ве́ры прославля́ет све́тло, / ученико́в преизря́дна, / и с Па́влом весь дванадесяточи́сленный собо́р днесь, / и́хже па́мять соверша́юще ве́рно, / сих Просла́вльшаго прославля́ем.

ИЮЛЬ

1. СВЯТЫХ И ЧУДОТВОРЦЕВ БЕЗСРЕБРЕНИКОВ КОСМЫ И ДАМИАНА РИМСКИХ (284)

Тропарь, глас 8:

Святи́и безсре́бреницы и чудотво́рцы Косьмо́ и Дамиа́не, / посети́те не́мощи на́ша: / ту́не прия́сте, ту́не дади́те нам.

Кондак, глас 2:

Благода́ть прии́мше исцеле́ний, / простира́ете здра́вие су́щим в ну́ждах, / вра́чеве, чудотво́рцы пресла́внии, / но ва́шим посеще́нием / ра́тников де́рзости низложи́те, / мир исцеля́юще чудесы́.

2. ПОЛОЖЕНИЕ ЧЕСТНЫЯ РИЗЫ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ ВО ВЛАХЕРНЕ (458)

Тропарь, глас 8:

Богоро́дице Присноде́во, челове́ков покро́ве, / ри́зу и по́яс пречи́стаго Твоего́ телесе́ / держа́вное гра́ду Твоему́ обложе́ние дарова́ла еси́, / безсе́менным рождество́м Твои́м нетле́нна пребыва́ющи, / о Тебе́ бо и естество́ обновля́ется и вре́мя. / Те́мже мо́лим Тя мир гра́ду Твоему́ дарова́ти / и душа́м на́шим ве́лию ми́лость.

Кондак, глас 4:

Одея́ние всем ве́рным нетле́ния, Богоблагода́тная Чи́стая, / дарова́ла еси́, свяще́нную ри́зу Твою́, / е́юже свяще́нное те́ло Твое́ покрыва́ла еси́, / покро́ве всех челове́ков, / ея́же положе́ние пра́зднуем любо́вию / и вопие́м со стра́хом Ти, Чи́стая: / ра́дуйся, Де́во, христиа́н похвало́.

4. ПРЕПОДОБНАГО АНДРЕЯ РУБЛЕВА, ИКОНОПИСЦА (XV)

Тропарь, глас 3:

Боже́ственнаго све́та луча́ми облиста́емый, / преподо́бне Андре́е, / Христа́ позна́л еси́, Бо́жию Прему́дрость и Си́лу, / и ико́ною Святы́я Тро́ицы всему́ ми́ру пропове́дал еси́ / Еди́нство во Святе́й Тро́ице, / мы же со удивле́нием и ра́достию вопие́м ти: / име́яй дерзнове́ние ко Пресвяте́й Тро́ице, / моли́ просвети́ти ду́ши на́ша.

Кондак, глас 8:

От ю́ности к Боже́ственней красоте́ устремля́яся, / чу́дный иконопи́сец в земли́ Росси́йстей был еси́, / и, богоно́сным твои́м учи́телем поревнова́в, / сия́нием доброде́телей украси́лся еси́, преподо́бне Андре́е, / те́мже и яви́ся Це́ркве на́шея похвала́ и ра́дование.

5. ПРЕПОДОБНАГО АФАНАСИЯ АФОНСКАГО (1000)

Тропарь, глас 3:

Е́же во пло́ти житию́ твоему́ / удиви́шася а́нгельстии чи́ни: / ка́ко с те́лом к неви́димым сплете́нием изше́л еси́, присносла́вне, / и уязви́л еси́ де́монския полки́. / Отону́дуже, Афана́сие, / Христо́с тебе́ воздаде́ бога́тыми дарова́ньми, / сего́ ра́ди, о́тче, моли́ / спасти́ся душа́м на́шим.

Кондак, глас 8:

Я́ко невеще́ственных суще́ств зри́теля изря́дна / и де́ятельна сказа́теля всеи́стинна, / взыва́ет тя ста́до твое́, Богоглаго́льниче: / не оскуде́й, моля́ о рабе́х твои́х, / изба́витися напа́стей и обхожде́ний, вопию́щим ти: / ра́дуйся, о́тче Афана́сие.

ПРЕПОДОБНАГО СЕРГИЯ, ИГУМЕНА РАДОНЕЖСКАГО И ВСЕЯ РОССИИ ЧУДОТВОРЦА (ОБРЕТЕНИЕ МОЩЕЙ, 1422)

Тропарь, глас 8:

От ю́ности восприя́л еси́ Христа́ в души́ твое́й, преподо́бне / и па́че всего́ вожделе́л еси́ мирска́го мяте́жа уклони́тися: / му́жески в пусты́ню всели́лся еси́ / и ча́да послуша́ния в ней, плоды́ смире́ния, возрасти́л еси́. / Тем, быв Тро́ице вселе́ние, / чудесы́ твои́ми всех просвети́л еси́, приходя́щих к тебе́ ве́рою, / и исцеле́ния всем подая́ оби́льно. / О́тче наш Се́ргие, моли́ Христа́ Бо́га, да спасе́т ду́ши на́ша.

Кондак, глас 8:

Днесь, я́ко со́лнце пресве́тло, возсия́вше от земли́, / честны́я мо́щи твоя́ нетле́нны обрето́шася, / я́ко благоуха́нный цвет, мно́жеством чуде́с сия́юще, / и всем ве́рным источа́юще разли́чная исцеле́ния, / и веселя́ще избра́нное твое́ ста́до, / е́же му́дре собра́в, до́бре па́ствил еси́. / О ни́хже и ны́не Тро́ице предстои́ши, моля́ся, / и во́инству победи́тельная на враги́ дарова́ти, / да вси вопие́м ти: ра́дуйся, Се́ргие богому́дре.

8. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ ЯВЛЕНИЯ ЕЯ ЧУДОТВОРНЫЯ ИКОНЫ ВО ГРАДЕ КАЗАНИ (1579)

Тропарь, глас 4:

Засту́пнице усе́рдная, / Ма́ти Го́спода Вы́шняго, / за всех мо́лиши Сы́на Твоего́, Христа́ Бо́га на́шего, / и всем твори́ши спасти́ся, / в держа́вный Твой покро́в прибега́ющим. / Всех нас заступи́, о Госпоже́, Цари́це и Влады́чице, / и́же в напа́стех, и ско́рбех, и в боле́знех обремене́нных грехи́ мно́гими, / предстоя́щих и моля́щихся Тебе́ умиле́нною душе́ю / и сокруше́нным се́рдцем / пред пречи́стым Твои́м о́бразом со слеза́ми / и невозвра́тно наде́жду иму́щих на Тя, / избавле́ния всех зол, / всем поле́зная да́руй / и вся спаси́, Богоро́дице Де́во: / Ты бо еси́ Боже́ственный покро́в рабо́м Твои́м.

Кондак, глас 8:

Притеце́м, лю́дие, к ти́хому сему́ и до́брому приста́нищу, / ско́рой Помо́щнице, гото́вому и те́плому спасе́нию, покро́ву Де́вы, / ускори́м на моли́тву и потщи́мся на покая́ние: / источа́ет бо нам неоску́дныя ми́лости Пречи́стая Богоро́дица, / предваря́ет на по́мощь, и избавля́ет от вели́ких бед и зол / благонра́вныя и богобоя́щияся рабы́ Своя́.

10. ПОЛОЖЕНИЕ ЧЕСТНЫЯ РИЗЫ ГОСПОДА НАШЕГО ИИСУСА ХРИСТА В МОСКВЕ (1625)

Тропарь, глас 4:

Днесь притеце́м, ве́рнии, / к Боже́ственней и цельбоно́сней ри́зе Спаси́теля на́шего Бо́га, / благоизво́лившаго сию́ пло́тию носи́ти / и на Кресте́ святу́ю Свою́ Кровь излия́ти, / е́юже искупи́ нас от рабо́ты вра́жия. / Тем благодаря́ще вопие́м Ему́: / спаси́ Оте́чество на́ше, / и архиере́ев, и град, и вся лю́ди, / честно́ю Твое́ю ри́зою защити́ / и спаси́ ду́ши на́ша, / я́ко Человеколю́бец.

Кондак, глас 4:

Одея́ние нетле́ния, спаси́тельнаго целе́ния / всем челове́ком, Влады́ко, дарова́л еси́, / Твое́ Боже́ственное сокро́вище – честну́ю ри́зу, / я́же есть хито́н, / е́юже живоно́сную и святу́ю плоть вочелове́чения Твоего́ / оде́яти благоволи́л еси́. / Сию́ жела́нием прие́млюще, све́тло пра́зднуем, / стра́хом же и любо́вию, я́ко Благоде́телю воспева́юще, / зове́м Ти, Христе́: / сохрани́ в ми́ре Оте́чество на́ше, и архиере́ев, и вся лю́ди, / по вели́цей Твое́й ми́лости.

11. СВЯТЫЯ РАВНОАПОСТОЛЬНЫЯ ВЕЛИКИЯ КНЯГИНИ РОССИЙСКИЯ ОЛЬГИ, ВО СВЯТЕМ КРЕЩЕНИИ ЕЛЕНЫ (969)

Тропарь, глас 1:

Крила́ми богоразу́мия впери́вши твой ум, / возлете́ла еси́ превы́ше ви́димыя тва́ри, / взыска́вши Бо́га и Творца́ вся́ческих, / и, Того́ обре́тши, па́ки рожде́ние Креще́нием прия́ла еси́, / дре́ва живо́тнаго наслажда́ющися, нетле́нна во ве́ки пребыва́еши, / О́льго присносла́вная.

Кондак, глас 4:

Воспое́м днесь Благоде́теля всех Бо́га, / просла́вльшаго в Росси́и О́льгу богому́друю, / да моли́твами ея́ / пода́ст душа́м на́шим / грехо́в оставле́ние.

В НЕДЕЛЮ, БЛИЖАЙШУЮ К 16 ИЮЛЯ. СВЯТЫХ ОТЕЦ ШЕСТИ ВСЕЛЕНСКИХ СОБОРОВ

Тропарь святых отец, глас 8:

Препросла́влен еси́, Христе́ Бо́же наш, / свети́ла на земли́ отцы́ на́ша основа́вый / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́.

Кондак, глас 8:

Апо́стол пропове́дание и оте́ц догма́ты / Це́ркве еди́ну ве́ру запечатле́ша, / я́же и ри́зу нося́щи и́стины, истка́нну от е́же свы́ше богосло́вия, / исправля́ет и сла́вит благоче́стия вели́кое та́инство.

15. СВЯТАГО РАВНОАПОСТОЛЬНАГО ВЕЛИКАГО КНЯЗЯ ВЛАДИМИРА, ВО СВЯТЕМ КРЕЩЕНИИ ВАСИЛИЯ, КРЕСТИТЕЛЯ РУСИ (1015)

Тропарь, глас 4:

Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ седя́ ма́тере градо́в, / богоспаса́емаго Ки́ева: / испыту́я же и посыла́я к Ца́рскому гра́ду / уве́дети правосла́вную ве́ру, / обре́л еси́ безце́нный би́сер – Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную. / Те́мже пра́зднуем твое́ успе́ние, / лю́дие твои́ су́ще, / моли́ спасти́ся держа́вы твоея́ Росси́йския нача́льником и мно́жеству владо́мых.

Кондак, глас 8:

Подо́бствовав вели́кому апо́столу Па́влу, в седи́нах, всесла́вне Влади́мире, / вся я́ко младе́нческая мудрова́ния, я́же о и́долех тща́ния оста́вль, / я́ко муж соверше́нный, украси́лся еси́ Боже́ственнаго Креще́ния багряни́цею, / и ны́не, Спа́су Христу́ в весе́лии предстоя́, / моли́ спасти́ся держа́вы Росси́йския нача́льником и мно́жеству владо́мых.

19. ПРАЗДНОВАНИЕ ОБРЕТЕНИЯ МОЩЕЙ ПРЕПОДОБНАГО СЕРАФИМА, САРОВСКАГО И ВСЕЯ РОССИИ ЧУДОТВОРЦА (1903)

Тропарь, глас 4:

От ю́ности Христа́ возлюби́л еси́, блаже́нне, / и, Тому́ Еди́ному рабо́тати пла́менне вожделе́в, / непреста́нною моли́твою и трудо́м в пусты́ни подвиза́лся еси́, / умиле́нным же се́рдцем любо́вь Христо́ву стяжа́в, / избра́нник возлю́блен Бо́жия Ма́тере яви́лся еси́. / Сего́ ра́ди вопие́м ти: / спаса́й нас моли́твами твои́ми, Серафи́ме, преподо́бне о́тче наш.

Кондак, глас 2:

Ми́ра красоту́ и я́же в нем тле́нная оста́вив, преподо́бне, / в Саро́вскую оби́тель всели́лся еси́ / и, та́мо а́нгельски пожи́в, / мно́гим путь был еси́ ко спасе́нию, / сего́ ра́ди и Христо́с тебе́, о́тче Серафи́ме, просла́ви / и да́ром исцеле́ний и чуде́с обогати́. / Те́мже вопие́м ти: / ра́дуйся, Серафи́ме, преподо́бне о́тче наш.

20. СВЯТАГО СЛАВНАГО ПРОРОКА БОЖИЯ ИЛИИ ФЕСВИТЯНИНА (IX В. ДО РОЖДЕСТВА ХРИСТОВА)

Тропарь, глас 4:

Во пло́ти А́нгел, / проро́ков основа́ние, / вторы́й Предте́ча прише́ствия Христо́ва, Илия́ сла́вный, / свы́ше посла́вый Елиссе́еви благода́ть / неду́ги отгоня́ти / и прокаже́нныя очища́ти, / те́мже и почита́ющим его́ то́чит исцеле́ния.

Кондак, глас 2:

Проро́че и прови́дче вели́ких дел Бо́га на́шего, / Илие́ великоимени́те, / веща́нием твои́м уста́вивый водото́чныя о́блаки, / моли́ о нас Еди́наго Человеколю́бца.

22. СВЯТЫЯ МИРОНОСИЦЫ РАВНОАПОСТОЛЬНЫЯ МАРИИ МАГДАЛИНЫ (I)

Тропарь, глас 1:

Христу́, нас ра́ди от Де́вы ро́ждшемуся, / честна́я Магдали́но Мари́е, после́довала еси́, / Того́ оправда́ния и зако́ны храня́щи. / Те́мже днесь всесвяту́ю твою́ па́мять пра́зднующе, / грехо́в разреше́ние / моли́твами твои́ми прие́млем.

Кондак, глас 3:

Предстоя́щи, пресла́вная, у Креста́ Спа́сова со ины́ми мно́гими, / и Ма́тери Госпо́дни состра́ждущи, и сле́зы точа́щи, / сие́ в похвалу́ приноша́ше, глаго́лющи: / что сие́ есть стра́нное чу́до? / Содержа́й всю тварь, пострада́ти изво́ли. / Сла́ва держа́ве Твое́й.

24. СВЯТЫХ МУЧЕНИК И СТРАСТОТЕРПЦЕВ РОССИЙСКИХ БЛАГОВЕРНЫХ КНЯЗЕЙ БОРИСА И ГЛЕБА, ВО СВЯТЕМ КРЕЩЕНИИ РОМАНА И ДАВИДА (1015)

Тропарь, глас 2:

Правди́вая страстоте́рпца / и и́стинная Ева́нгелия Христо́ва послу́шателя, / целому́дренный Рома́не с незло́бивым Дави́дом, / не сопроти́в ста́ста врагу́ су́щу бра́ту, / убива́ющему телеса́ ва́ша, / душа́м же косну́тися не могу́щу. / Да пла́чется у́бо злый властолю́бец, / вы же, ра́дующеся с ли́ки А́нгельскими, / предстоя́ще Святе́й Тро́ице, / моли́теся о держа́ве сро́дников ва́ших богоуго́дней бы́ти / и сыново́м Росси́йским спасти́ся.

Кондак, глас 3:

Возсия́ днесь пресла́вная па́мять ва́ша, / благоро́днии страстоте́рпцы Христо́вы, Рома́не и Дави́де, / созыва́ющи нас к похвале́нию Христа́ Бо́га на́шего. / Тем, притека́юще к ра́це моще́й ва́ших, / исцеле́ния дар прие́млем моли́твами ва́шими, святи́и: / вы бо боже́ственнии вра́чеве есте́.

25. СВЯТЫЯ ПРАВЕДНЫЯ АННЫ, МАТЕРЕ ПРЕСВЯТЫЯ БОГОРОДИЦЫ

Тропарь, глас 4:

Жизнь ро́ждшую во чре́ве носи́ла еси́, Чи́стую Богома́терь, / богому́драя А́нно. / Те́мже к прия́тию Небе́сному, иде́же веселя́щихся жили́ще, / в сла́ве ра́дующися, ны́не преста́вилася еси́, / чту́щим тя любо́вию / прегреше́ний прося́щи очище́ние, / присноблаже́нная.

Кондак, глас 2:

Прароди́телей Христо́вых па́мять пра́зднуем, / тех ве́рно прося́ще по́мощи / изба́витися всем от вся́кия ско́рби, зову́щим: / Бог наш с на́ми, сих прославле́й, я́коже благоволи́.

27. СВЯТАГО ВЕЛИКОМУЧЕНИКА И ЦЕЛИТЕЛЯ ПАНТЕЛЕИМОНА (305)

Тропарь, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 5:

Подража́тель сый Ми́лостиваго / и исцеле́ний благода́ть от Него́ прие́м, / страстоте́рпче и му́чениче Христа́ Бо́га, / моли́твами твои́ми душе́вныя на́ша неду́ги исцели́, / отгоня́ при́сно борца́ собла́зны от вопию́щих ве́рно: / спаси́ ны, Го́споди.

28. ПРАЗДНОВАНИЕ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ РАДИ ИКОНЫ ЕЯ, ИМЕНУЕМЫЯ «СМОЛЕНСКАЯ ОДИГИТРИЯ» (ПУТЕВОДИТЕЛЬНИЦА, 1046)

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погиба́ем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Кондак, глас 6:

Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, / ве́рно зову́щих Ти: / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

АВГУСТ

1. ПРОИСХОЖДЕНИЕ (ИЗНЕСЕНИЕ) ДРЕВ ЧЕСТНАГО И ЖИВОТВОРЯЩАГО КРЕСТА ГОСПОДНЯ И СВЯТЫХ СЕМИ МУЧЕНИК БРАТИЙ МАККАВЕЙ, УЧИТЕЛЯ ИХ ЕЛЕАЗАРА И МАТЕРЕ ИХ СОЛОМОНИИ (166 ДО РОЖДЕСТВА ХРИСТОВА)

Тропарь мучеников, глас 1:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Тропарь Креста, глас тойже:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя / и Твое́ сохраня́я Кресто́м Твои́м жи́тельство.

Кондак святых, глас 2:

Прему́дрости Бо́жия столпи́ седмочи́сленнии / и Боже́ственнаго Све́та свети́льницы седмосве́щнии, / Маккаве́и всему́дрии, / пре́жде му́чеников преве́лии му́ченицы, / с ни́миже всех Бо́гу моли́теся / спасти́ся почита́ющим вас.

Кондак Креста, глас 4. Подобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на супоста́ты, / посо́бие иму́щим Твое́ ору́жие ми́ра / непобеди́мую побе́ду.

5. ПРЕДПРАЗДНСТВО ПРЕОБРАЖЕНИЯ ГОСПОДА НАШЕГО ИИСУСА ХРИСТА

Тропарь, глас 4:

Христо́во преображе́ние предусря́щем, / све́тло торжеству́юще предпра́зднственная, ве́рнии, и возопии́м: / приспе́ день Боже́ственнаго весе́лия, / восхо́дит на го́ру Фаво́рскую Влады́ка, / Божества́ Своего́ облиста́ти красоту́.

Кондак, глас 4:

Боже́ственным днесь преображе́нием / челове́ческое все естество́ / просиява́ет боже́ственно, / в весе́лии зову́щее: / преобразу́ется Христо́с, спаса́яй вся.

6. ПРЕОБРАЖЕНИЕ ГОСПОДА БОГА И СПАСА НАШЕГО ИИСУСА ХРИСТА

Тропарь, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́.

Кондак, глас 7:

На горе́ преобрази́лся еси́, / и я́коже вмеща́ху ученицы́ Твои́, / сла́ву Твою́, Христе́ Боже́, ви́деша, / да егда́ Тя у́зрят распина́ема, / страда́ние у́бо уразуме́ют во́льное, / ми́рови же пропове́дят, / я́ко Ты еси́ вои́стинну О́тчее сия́ние.

9. СВЯТАГО АПОСТОЛА МАТФИЯ (ОК 63)

Тропарь, глас 3:

Апо́столе святы́й Матфи́е, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 4:

Светоза́рное, я́ко со́лнце, / во весь мир изше́дшее / веща́ние твое́ / просвеща́ет язы́ческую Це́рковь благода́тию, / чудоно́сче Матфи́е апо́столе.

13. СВЯТИТЕЛЯ ТИХОНА, ЕПИСКОПА ВОРОНЕЖСКАГО, ЗАДОНСКАГО ЧУДОТВОРЦА (1783; ВТОРОЕ ОБРЕТЕНИЕ МОЩЕЙ, 1991)

Тропарь, глас 8:

От ю́ности возлюби́л еси́ Христа́, блаже́нне, / о́браз всем был еси́ сло́вом, житие́м, любо́вию, / ду́хом, ве́рою, чистото́ю и смире́нием, / те́мже и всели́лся еси́ в Небе́сныя оби́тели, / иде́же предстоя́ Престо́лу Пресвяты́я Тро́ицы, / моли́, святи́телю Ти́хоне, / спасти́ся душа́м на́шим.

Кондак, глас 8:

Апо́столов прее́мниче, / святи́телей украше́ние, / Правосла́вныя Це́ркве учи́телю, / Влады́це всех моли́ся / мир вселе́нней дарова́ти / и душа́м на́шим ве́лию ми́лость.

14. ПРЕДПРАЗДНСТВО УСПЕНИЯ ПРЕСВЯТЫЯ БОГОРОДИЦЫ

Тропарь, глас 4:

Лю́дие, предыгра́йте, / рука́ми пле́щуще ве́рно, / и любо́вию собери́теся, / днесь ра́дующеся / и све́тло восклица́юще вси весе́лием: / Бо́жия бо Ма́ти и́мать от земны́х к Вы́шним прейти́ сла́вно, / Ю́же пе́сньми при́сно я́ко Богоро́дицу сла́вим.

Кондак, глас 4:

В сла́вней па́мяти Твое́й / вселе́нная, невеще́ственным Ду́хом испещре́на, / у́мно с весе́лием зове́т Тебе́: / ра́дуйся, Де́во, / христиа́н похвало́.

ПРЕПОДОБНАГО ФЕОДОСИЯ ПЕЧЕРСКАГО (ПРЕНЕСЕНИЕ МОЩЕЙ, 1091)

Тропарь, глас 8:

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / мона́шествующих Богодухнове́нное удобре́ние, / Феодо́сие прему́дре, / уче́ньми твои́ми вся просвети́л еси́, / цевни́це духо́вная. / Моли́ Христа́ Бо́га спасти́ся душа́м на́шим.

Кондак, глас 8:

Насле́дник отце́в был еси́, преподо́бне, / тех после́дуя житию́ и уче́нию, / обы́чаю и воздержа́нию, / моли́тве же и предстоя́нию. / С ни́миже, име́я дерзнове́ние ко Го́споду, / проще́ние согреше́ний и спасе́ние испроси́ вопию́щим ти: / ра́дуйся, о́тче Феодо́сие.

15. УСПЕНИЕ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 1:

В рождестве́ де́вство сохрани́ла eси́, / во успе́нии ми́ра не оста́вила eси́, Богоро́дице, / преста́вилася eси́ к животу́, Ма́ти су́щи Живота́, / и моли́твами Твои́ми избавля́еши от сме́рти ду́ши на́ша.

Кондак, глас 2:

В моли́твах Неусыпа́ющую Богоро́дицу / и в предста́тельствах непрело́жное упова́ние / гроб и умерщвле́ние не удержа́ста: / я́коже бо Живота́ Ма́терь / к животу́ преста́ви / во утро́бу Всели́выйся присноде́вственную.

16. ПРЕНЕСЕНИЕ ИЗ ЕДЕСА В ЦАРЬГРАД НЕРУКОТВОРЕННАГО ОБРАЗА ГОСПОДА БОГА И СПАСА НАШЕГО ИИСУСА ХРИСТА (944)

Тропарь, глас 2:

Пречи́стому Твоему́ о́бразу покланя́емся, Благи́й, / прося́ще проще́ния прегреше́ний на́ших, Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши я́же созда́л еси́ от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся, Спа́се наш, / прише́дый спасти́ мир.

Кондак, глас 2:

Неизрече́ннаго и Боже́ственнаго Твоего́ к челове́ком смотре́ния, / неопи́санное Сло́во О́тчее, / и о́браз непи́санный, / и богопи́санный победи́телен, / ве́дуще нело́жнаго Твоего́ воплоще́ния, / почита́ем, того́ лобыза́юще.

26. ПРАЗДНЕСТВО В ЧЕСТЬ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ РАДИ СРЕТЕНИЯ ЕЯ ВЛАДИМИРСКИЯ ИКОНЫ (1395)

Тропарь, глас 4:

Днесь све́тло красу́ется сла́внейший град Москва́, / я́ко зарю́ со́лнечную, восприе́мши, Влады́чице, / чудотво́рную Твою́ ико́ну, / к не́йже ны́не мы притека́юще и моля́щеся Тебе́, взыва́ем си́це: / о, пречу́дная Влады́чице Богоро́дице! / Моли́ся из Тебе́ воплоще́нному Христу́ Бо́гу на́шему, / да изба́вит град сей и вся гра́ды и страны́ христиа́нския / невреди́мы от всех наве́т вра́жиих / и спасе́т ду́ши на́ша, я́ко Милосе́рд.

Кондак, глас 8:

Взбра́нной Воево́де победи́тельная, / я́ко изба́вльшеся от злых / прише́ствием Твоего́ честна́го о́браза, Влады́чице Богоро́дице, / све́тло сотворя́ем пра́зднество сре́тения Твоего́ и обы́чно зове́м Ти: / ра́дуйся, Неве́сто Неневе́стная.

29. УСЕКНОВЕНИЕ ЧЕСТНЫЯ ГЛАВЫ СВЯТАГО СЛАВНАГО ПРОРОКА, ПРЕДТЕЧИ И КРЕСТИТЕЛЯ ГОСПОДНЯ ИОАННА

Тропарь, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в, ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра / и подаю́щаго нам ве́лию ми́лость.

Кондак, глас 5:

Предте́чево сла́вное усекнове́ние / смотре́ние бысть не́кое Боже́ственное, / да и су́щим во а́де Спа́сово пропове́сть прише́ствие. / Да рыда́ет у́бо Ироди́я, / беззако́нное уби́йство испроси́вши: / не зако́н бо Бо́жий, ни живы́й век возлюби́, / но притво́рный, привре́менный.

30. ПРЕНЕСЕНИЕ МОЩЕЙ СВЯТАГО БЛАГОВЕРНАГО ВЕЛИКАГО КНЯЗЯ АЛЕКСАНДРА НЕВСКАГО (1724)

Тропарь, глас 4:

Позна́й свою́ бра́тию, росси́йский Ио́сифе, / не в Еги́пте, но на Небеси́ ца́рствующий, / благове́рный кня́же Алекса́ндре, / и приими́ моле́ния их, / умножа́я жи́та лю́дем плодоно́сием земли́ твоея́, / гра́ды влады́чествия твоего́ огражда́я моле́нием / и правосла́вным христиа́ном на сопроти́вныя спобо́рствуя.

Кондак, глас 4:

Я́коже сро́дницы твои́ Бори́с и Глеб / яви́шася тебе́ с Небесе́ в по́мощь, / подвиза́ющемуся на Ве́лгера Све́йскаго и во́ев его́, / та́ко и ты ны́не, / блаже́нне Алекса́ндре, / прииди́ в по́мощь твои́м сро́дником / и побори́ борю́щия ны.

31. ПОЛОЖЕНИЕ ЧЕСТНАГО ПОЯСА ПРЕСВЯТЫЯ БОГОРОДИЦЫ (ОК. 395–408)

Тропарь, глас 8:

Богоро́дице Присноде́во, челове́ков покро́ве, / ри́зу и по́яс пречи́стаго Твоего́ телесе́, / держа́вное гра́ду Твоему́ обложе́ние дарова́ла еси́, / безсе́менным рождество́м Твои́м нетле́нна пребыва́ющи, / о Тебе́ бо и естество́ обновля́ется и вре́мя. / Те́мже мо́лим Тя мир гра́ду Твоему́ дарова́ти / и душа́м на́шим ве́лию ми́лость.

Кондак, глас 2:

Благоприя́тное Твое́ чре́во, Богоро́дице, / объе́мший по́яс Твой честны́й / держа́ва гра́ду Твоему́ необори́ма / и сокро́вище есть благи́х неоску́дно, / еди́на ро́ждшая, Присноде́во.

Ин кондак, глас 4:

Честна́го по́яса Твоего́ положе́ние / пра́зднует днесь Твой, Препе́тая, храм / и приле́жно взыва́ет Ти: / ра́дуйся, Де́во, / христиа́н похвало́.