Кондак 1

Возбра́нный святи́телю Це́ркве Правосла́вныя и испове́дниче, возсия́вый стране́ на́шей в земли́ Кры́мстей, я́ко светоза́рное свети́ло, до́бре потруди́выйся и за и́мя Христо́во гоне́ние претерпе́вый, прославля́юще просла́вльшаго тя Го́спода, дарова́вшаго нам тебе́ но́ваго моли́твенника и помо́щника, похва́льное воспева́ем ти пе́ние: ты же, я́ко име́яй ве́лие дерзнове́ние ко Влады́це небесе́ и земли́, от вся́ких неду́гов душе́вных и теле́сных свободи́ нас и до́бре стоя́ти в Правосла́вии укрепи́, да вси во умиле́нии зове́м ти:

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Икос 1

Ангелов собесе́дниче и челове́ков наста́вниче, Луко́ пресла́вный, подо́бно евангели́сту и апо́столу Луке́, ему́же тезоимени́т еси́, от Бо́га дар цели́ти неду́ги челове́ческия прия́л еси́, во врачева́нии боле́зней бли́жних, мно́гия труды́ подъе́мля, и, плоть нося́, о пло́ти нераде́л еси́, де́лы до́брыми Отца́ Небе́снаго просла́вил еси́. Те́мже благода́рне во умиле́нии зове́м ти:

Ра́дуйся, от ю́ности ра́зум свой и́гу Христо́ву покори́вый;

ра́дуйся, пречестно́е Святы́я Тро́ицы селе́ние бы́вый.

Ра́дуйся, блаже́нство ми́лостивых, по Сло́ву Го́спода, унасле́довавый;

ра́дуйся, ве́рою Христо́вою и зна́нием богодарова́нным мно́гия неду́жныя исцели́вый.

Ра́дуйся, стра́ждущих неду́гами теле́сными врачу́ милосе́рдный;

ра́дуйся, во дни бра́ни вожде́й и во́инов исцели́телю.

Ра́дуйся, всех враче́в наста́вниче;

ра́дуйся, ско́рый в ну́ждах и ско́рбех су́щим помо́щниче.

Ра́дуйся, Це́ркве Правосла́вныя утвержде́ние;

ра́дуйся, земли́ на́шея озаре́ние.

Ра́дуйся, кры́мския па́ствы похвало́;

ра́дуйся, гра́да Симферо́поля украше́ние.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 2

Ви́дя в челове́цех во время врачеваний, а́ки в зерца́ле, премудрость и славу Творца всяческих Бога, к Нему Духом вы́ну возносился еси, богомудре, светом же богоразумия твоего и нас озари, да вопием ку́пно с тобою:Аллилу́ия.

Икос 2

Разум твой божественными уче́ньми просветил еси, Луко́ всеславне, отвергнув всяко плотско́е мудрова́ние, с разумом же и волю повину́л еси Господеви. Подобен апостолом быв, ти́и бо по Слову Христову: «Гряди́та по Мне, и сотворю вы ловца́ человеком» оставиша вся и по Нем идоша, и ты, святе, услышав зовущаго тя на служение Господа Иисуса чрез раба Своего архиепископа Ташкентского Иннокентия, а́бие прие́млеши священство в Церкви Православней. Сего ради, яко богомудраго наставника тя ублажающе, воспеваем сице:

Ра́дуйся, Ангела Хранителя увеселение;

радуйся, яко того николиже опечалил еси.

Радуйся, во учении преспева́вый и тем мудрецы мира сего удививый;

радуйся, от творящих беззаконие уклони́выйся.

Радуйся, Божия Премудрости созерцателю и проповедниче;

радуйся, истиннаго богословия златослове́сный учителю.

Радуйся, апостольских преданий блюстителю;

радуйся, свеще́, Богом возжже́нная, мрак нечестия разгоняющая.

Радуйся, звездо́, путь ко спасению показующая;

радуйся, православия ревнителю.

Радуйся, раскольников обличителю;

радуйся, свиде́ний и оправданий Господних возжада́вый.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 3

Си́лою благодати Божия, еще во временней жизни прия́л еси дар, свя́те Луко́, недуги целити, да вси усердно притекающии к тебе недугов телесных и паче душевных исцеления сподобляются вопиюще Богу:Аллилу́ия.

Икос 3

Име́я неусыпное попечение о спасении душ, вверенных тебе от Бога, Луко́ блаженне, пастырски к душеспаси́тельной жизни и словом и са́мым делом непрестанно наставлял еси. Сего ради приими́ от нашего усердия достойныя похвалы тебе:

Ра́дуйся, Божия разума исполненный;

радуйся, благодатию Духа Святого приосене́нный.

Радуйся, нищеты Христовы подражателю;

радуйся, па́стырю добрый, уклоняющихся от веры православныя и блуждающих по горам суему́дрия взыскавый.

Радуйся, де́лателю винограда Христова, чад Божиих укрепляяй в истинной вере православней;

радуйся, щите, защищаяй благочестие.

Радуйся, непоколебимое Православия основание;

радуйся, твердый ка́меню веры.

Радуйся, душепа́губного неверия и злотворнаго обновленчества обличителю и искоренителю;

радуйся, в делании духо́внем подвизающихся мудрый укрепи́телю.

Радуйся, от мира изгна́нным пристанища тихаго указа́телю;

радуйся, яко приим крест Христу последовал еси.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 4

Бу́рю внутрь имея помышлений многих, недоумеваше раб Божий, что речет о нем Господь, егда́ проразумева́ху его достойна быти епископом граду Ташкенту: обаче всего себе Христу Богу предаде́, Тому о всем благодаре́ние возсылая, зовы́й: «Благословен Бог, изливаяй Бдагодать Свою на архиереи Своя», и поя ему:Аллилу́ия.

Икос 4

Слы́шавше лю́дие православнии, в гонении сущии, о благоплодных добро́тах души́ твоея́, богоно́се Луко́, и видевше на степе́ни святительства, яко достойный сосуд Божественныя благодати, вся немощна́я врачующия и оскудева́ющая восполняющия, дивя́тся чудному промышлению Бога о тебе и приносят ти сицева́я благохвале́ния:

Ра́дуйся, архиерею, от Самого́ Господа пронареченный;

радуйся, о надписании сана епископскаго на книзе твоей предуказа́ние мысленное приемый.

Радуйся, иерархов украшение;

радуйся, пастырю добрый, яко готов был еси душу твою положити за овцы твоя словесныя.

Радуйся, многосветлый Церкве светильниче;

радуйся, апостолов сопричастниче.

Радуйся, исповедников украшение;

радуйся, о себе попечение всякое отверги́й.

Радуйся, скорбей утолителю;

радуйся, о людских неве́жествиих печальниче.

Радуйся, искавших спасения правым учением оглаша́вый;

радуйся, житием твоим сего учения не посрамивый.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 5

Богото́чною кровию от вечныя смерти искупле́нныя соблюдая, егда сан епископа во дни страшных гонений по благословению святаго Патриарха Тихона от рук епископов православных прия́л еси, святителю Луко́, дело благовестника добре сотворил еси, обличая, запрещая, умоляя, всяким долготерпением и учением, и поя Богу:Аллилу́ия.

Икос 5

Ви́деша ангельстии чи́нове великия твоя подвиги, егда по заповеди Господней: «Блажени изгнани правды ради, яко тех есть Царствие Небесное», в крепости сердечней безропотно понесл еси заточение и изгнание в Сибирь за имя Господа и святую Церковь Христову, терпением ве́лиим устроя́я свое спасение, примером же своим верных души назидая. Мы же тя, усердно любовию почитающе, честву́ем похвала́ми сими:

Ра́дуйся, светильниче, на свещнице церковнем поставленный;

радуйся, яко слово Писания: «Любы долготерпит», на тебе оправдася.

Радуйся, защищати тя верным воспретивый;

радуйся, власте́м повинувыйся и сего ради волею в руки воинов нощию предавыйся.

Радуйся, клевре́ты неправедных суде́й уничиже́нный;

радуйся, в заточение со смирением безропотно ше́дый.

Радуйся, из управляемыя тобой Ташкентския епархии правды ради изгна́нный;

радуйся, верными оплаканный.

Радуйся, за Господа распятаго изъя́звленный и зауше́нный;

радуйся, уста лживых неве́ров заградивый.

Радуйся, праведными устами небесныя истины и в изгнании вещавый;

радуйся, яко мученицы на небесех о терпении твоем ликоваху.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 6

Пропове́дник немолчный тайны Пресвятыя, Единосущныя и Неразделимыя Троицы был еси и в темнице, и во граде́х сибирскаго изгнания, терпя глад, мраз северныя страны и жестокость клевре́тов безбожных. Сего ради проповедует Церковь Крымская величия Божия, явле́нная на тебе, святителю Луко́, яко приял еси дар целити недуги душевныя и телесныя и в стране изгнания, да вси единым сердцем и едиными усты воспеваем Богу:Аллилу́ия.

Икос 6

Возсия́л еси, яко звезда лучезарная, красноярстей пастве и тамбовстей, озаряя души верных и разгоняя тьму нечестия и безбожия. И испо́лнишася на тебе слова Христовы: «Блажени есте, егда поносят вам, и ижденут, и рекут всяк зол глагол на вы лжуще, Мене ради». Ты же, гонимый из града во град и клеветы́ терпя, архипастырское служение усердно исполнял еси и сладостию писаний твоих насыщал вся алчущия и жаждущия правды, иже благода́рне взывают тебе:

Ра́дуйся, наставниче, всех к небеси наставляяй;

радуйся, славы Божия истинный ревнителю.

Радуйся, воине Христов непобедимый;

радуйся, за Христа Господа темницы и биения терпевый.

Радуйся, смирения Его истинный подражателю;

радуйся, вместилище Духа Святаго.

Радуйся, вше́дый с мудрыми в радость Господа твоего;

радуйся, корыстолюбия обличителю.

Радуйся, пагубу тщеславия показавый;

радуйся, беззаконники ко обращению призывавый.

Радуйся, имже сатана посрами́ся;

радуйся, имже Христос просла́вися.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 7

Хотя́ достойно совершити подвиг, возложе́нный на тя от Бога, облеклся еси во вся оружия Божия и стал на брань проти́ву миродержителей века сего, духо́в злобы поднебесных, препоясав чресла своя истиною и обо́лкся в броню правды, и угаси́л, исповедниче Луко́, вся стрелы лукаваго, поя Содетелю и Богу:Аллилу́ия.

Икос 7

Но́вое гонение воздви́же беззаконных человек и безбожных на Церковь Православную, и в дальнюю таежную глубину угнаша тя, святителю Луко, и близ смерти быв, рукою Божиею сохранен, взывал еси с Павлом апостолом: «До нынешнего часа́ и алчем, и жаждем, и наготу́ем, и страждем, и скитаемся… Гони́ми, терпи́м: якоже отре́би миру бы́хом, всем попрание досе́ле». Сего ради, ве́дуще таковая, ублажаем тя:

Ра́дуйся, исповедниче Христов блаженный;

радуйся, мраз лютый претерпевый.

Радуйся, близ смерти бывый, Господом сохраненный;

радуйся, самоотвержение всецелое показавый.

Радуйся, уневестивый душу твою Жениху Христу;

радуйся, Господа распятаго на кресте присно пред собою предзревый.

Радуйся, яко во бдениих и молитвах неослабно пребывал еси;

радуйся, Единосущныя Троицы истинный ревнителю.

Радуйся, скорый от всякия болезни безмездный врачу́;

радуйся, ломо́тныя и опу́хлыя уврачевавый.

Радуйся, от неисцельныя гнойныя болезни костей и ран здравы возставивый;

радуйся, яко верою твоею и трудами врачевными расслабленнии исцелеша.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 8

Стра́нник во юдоли земней быв, терпения, воздержания и чистоты образ показал еси, исповедниче Луко́. Любовь евангельскую явил еси, егда отечество в опасности от нашествия иноплеменник пребыва́ше, денноно́щно во врачебнице трудился, исцеляя недуги и раны вождей и воинов отечества земна́го, непамятозло́бием и любовию удивляя всех творящих ти напасти, и многия сим обратил еси ко Христу, во еже пети Ему:Аллилу́ия.

Икос 8

Весь испо́лнь любве Христовы, Луко́ благосерде, душу твою полагал еси за дру́ги твоя, и яко Ангел–хранитель присущ был еси ближним и дальним, озлобившияся укрощая, враждующия примиряя и спасение всем устроя́я. Поминающе труды твоя во благо людей отечествия твоего, благодарне взываем ти:

Ра́дуйся, дивную любовь ко отечеству земному показавый;

радуйся, смирения и незлобия учителю.

Радуйся, изгнание и жестокия муки мужему́дренно претерпевый;

радуйся, за Христа пострадавый и мучимый.

Радуйся, твердо Его исповедавый;

радуйся, злобу врагов любовию Христовою победивый.

Радуйся, отче благосердный, взыскавый спасения многих;

радуйся, яко великими скорбями был еси искушаем.

Радуйся, в гонениих терпение дивное явивый;

радуйся, яко за враги умолял еси Господа.

Радуйся, егоже любовь победи всяку вражду;

радуйся, егоже незлобие покори жестокая сердца́.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 9

Всем был еси вся, якоже и святый Павел, да всяко некия спасеши, святителю Луко́: ты бо, архипастырский подвиг совершая в тамбовстем крае, многими труды храмы обновляя и созидая, уставы святоотеческия строго соблюдая, спасению паствы твоея служити не престал еси, чисто Бо́гови поя:Аллилу́ия.

Икос 9

Вити́и человечестии не возмогут по достоянию изрещи́ твоих благодеяний множество, егда явился на Крымстей земли, яко отец чадолюби́вый, святителю отче Луко́. Щедрода́тельная бо десни́ца твоя всюду досяза́ше. Мы же, благосе́рдию твоему подражати хотя́ще, во удивлении взываем к тебе:

Ра́дуйся, луче́ любве́ Божия;

радуйся, сокровище милосердия Спасова неистощимое.

Радуйся, яко вся своя неимущим раздавал еси;

радуйся, ближния твоя паче себе возлюбивый.

Радуйся, безматерних сирот питателю и окормителю;

радуйся, безпомо́щных старцев и стариц попечителю.

Радуйся, яко болящия и в темнице заключенныя посещал еси;

радуйся, яко нужды бедных предварял еси в различных местах отечества своего.

Радуйся, яко, нищия поминая, обеды им устроял еси;

радуйся, яко коемуждо в горестех, аки Ангел уте́шитель, являлся еси.

Радуйся, Ангеле земный и человече небесный;

радуйся, яко о глубине милосердия твоего Мати Божия возрадовася.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 10

Спасе́нию крымския паствы твоея служити многоле́тне не престал по образу пастыреначальника Христа: на ра́мех заблудшее взем естество, Богу и Отцу привел еси. Божиим бо милосердием утешая, ко исправлению жития словесы́ учительными твоими влекл еси вся, во еже сердцем чистым пети Богу:Аллилу́ия.

Икос 10

Царя́ Небе́снаго Христа́ Бога верный служитель быв, святителю отче Луко́, неустанно возвещал еси слово истины во всех хра́мех земли нашея Таврическия, душеспасительною пищею учения евангельскаго верная чада научая и устав церковный строго исполняти повелева́я. Темже тя, яко пастыря добраго, сице прославляем:

Ра́дуйся, неутомимый проповедниче правды евангельския;

радуйся, Богом врученное тебе стадо словесное добре упасы́й.

Радуйся, овцы своя словесныя от душегубных волков охранявый;

радуйся, чина церковного строгий блюстителю.

Радуйся, чистоты веры православныя охранителю;

радуйся, тобою бо Дух Святый написа словеса спасительная.

Радуйся, яко тайну богословия о духе, душе и теле явил еси нам;

радуйся, яко словеса твоя, аки в ризы позлащены, в тайны веры одеяшася.

Радуйся, молние, гордыню низлагающая;

радуйся, громе, беззаконно живущия устрашаяй.

Радуйся, церковного благочестия насадителю;

радуйся, архипастырю, пастыри духовныя наставляяй и вразумляяй непрестанно.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 11

Пе́ние у гроба твоего, угодниче Божий, не умолка́ше во днех блаженнаго успения твоего. Мнози бо, ве́девше тя богоносна и равноангельна суща, собрашася от всех предел земнаго твоего отечествия совершити соборное моление о душе твоей, восходящей в горния обители отечествия небеснаго, воспевающе и поюще Богу:Аллилу́ия.

Икос 11

Свеща́ в Церкви Христовой, горящая невещественным светом благодати Божия, был еси, святителю Луко, вся концы земли нашея озаряя. Егда же приспе́ время отшествия твоего, божественнии Ангели прияша святую душу твою и в небесныя обители вознесоша. Темже, поминающе блаженное успение и велие твое на небеси и на земли прославление, с радостию приносим ти благохвале́ния сия:

Ра́дуйся, светильниче немеркнущий Света Невечерняго;

радуйся, яко мнози прославиша чрез твоя добрая дела Отца Небеснаго.

Радуйся, яко свет добрых дел твоих просветися пред человеки;

радуйся, житием твоим праведным Богу угоди́вый.

Радуйся, угодниче Божий, течение благоче́стне скончавый;

радуйся, веру, надежду и любовь от Господа стяжавый.

Радуйся, со Христом, Егоже возлюбил еси, на веки соединивыйся;

радуйся, Царствия Небеснаго и славы вечныя наследниче.

Радуйся, архиерею, от вечного Архиерея Христа благодатными дарами исполненный;

радуйся, скорый помощниче призывающим тя.

Радуйся, земли Крымския новое светило и утверждение;

радуйся, рода христианскаго благодатный покровителю.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 12

Благода́ть, свыше ти данную, познавше, благоговейно лобызаем честна́го лика твоего изображение, святителю Луко́, чающе тобою получити просимое от Бога. Темже припа́дающе ко святым моще́м твоим, со умилением молим тя: укрепи нас до́бре стояти в вере православней и угождающе благими де́лы немолчно пети Богу:Аллилу́ия.

Икос 12

Пою́ще Бога, дивнаго во святых Своих, хвалим тя, Христова исповедника, святителя и предстателя пред Господем. Весь бо еси в вышних, но и нижних не оставляеши, святителю отче Луко́, присно со Христом царствуеши и о нас грешных пред престолом Божиим хода́тайствуеши. Сего ради во умилении зовем ти:

Ра́дуйся, света неприступнаго зрителю;

радуйся, звездо лучезарная, над землею нашею возсиявшая.

Радуйся, емуже сорадуются Ангели, и о немже веселятся человецы;

радуйся, научивый заповедем Христовым и сотворивый я.

Радуйся, яко достоин явился еси Царствия Небеснаго;

радуйся, путем исповедничества райских селений достигший.

Радуйся, поношения Христа ради терпевый и вечную с Ним славу приемый;

радуйся, души наша к Царствию Небесному путеводяй.

Радуйся, предстателю пред Престолом Божиим за нас грешных;

радуйся, Православия похвало и земли нашея радование.

Радуйся, в сонме святых быти сподобивыйся;

радуйся, собору всех Крымских святых сопричастниче.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 13

Овели́кий и пресла́вный угодниче Божий, святителю отче наш Луко́, приими́ сие похвальное пение от нас недостойных, обаче с любовию сыно́внею тебе приносимое. Предстательством твоим у Престола Божия и молитвами твоими всех нас в вере православней и добрых де́лех утверди. От всяких бед, скорбей, болезней и напастей в сей жизни находящих сохрани, от мучений в будущем веце избави. И сподоби в вечней жизни купно с тобою и со всеми святыми пети Творцу нашему:Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

Икос 1

Ангелов собесе́дниче и челове́ков наста́вниче, Луко́ пресла́вный, подо́бно евангели́сту и апо́столу Луке́, ему́же тезоимени́т еси́, от Бо́га дар цели́ти неду́ги челове́ческия прия́л еси́, во врачева́нии боле́зней бли́жних, мно́гия труды́ подъе́мля, и, плоть нося́, о пло́ти нераде́л еси́, де́лы до́брыми Отца́ Небе́снаго просла́вил еси́. Те́мже благода́рне во умиле́нии зове́м ти:

Ра́дуйся, от ю́ности ра́зум свой и́гу Христо́ву покори́вый;

ра́дуйся, пречестно́е Святы́я Тро́ицы селе́ние бы́вый.

Ра́дуйся, блаже́нство ми́лостивых, по Сло́ву Го́спода, унасле́довавый;

ра́дуйся, ве́рою Христо́вою и зна́нием богодарова́нным мно́гия неду́жныя исцели́вый.

Ра́дуйся, стра́ждущих неду́гами теле́сными врачу́ милосе́рдный;

ра́дуйся, во дни бра́ни вожде́й и во́инов исцели́телю.

Ра́дуйся, всех враче́в наста́вниче;

ра́дуйся, ско́рый в ну́ждах и ско́рбех су́щим помо́щниче.

Ра́дуйся, Це́ркве Правосла́вныя утвержде́ние;

ра́дуйся, земли́ на́шея озаре́ние.

Ра́дуйся, кры́мския па́ствы похвало́;

ра́дуйся, гра́да Симферо́поля украше́ние.

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Кондак 1

Возбра́нный святи́телю Це́ркве Правосла́вныя и испове́дниче, возсия́вый стране́ на́шей в земли́ Кры́мстей, я́ко светоза́рное свети́ло, до́бре потруди́выйся и за и́мя Христо́во гоне́ние претерпе́вый, прославля́юще просла́вльшаго тя Го́спода, дарова́вшаго нам тебе́ но́ваго моли́твенника и помо́щника, похва́льное воспева́ем ти пе́ние: ты же, я́ко име́яй ве́лие дерзнове́ние ко Влады́це небесе́ и земли́, от вся́ких неду́гов душе́вных и теле́сных свободи́ нас и до́бре стоя́ти в Правосла́вии укрепи́, да вси во умиле́нии зове́м ти:

Ра́дуйся, святи́телю Кры́мский испове́дниче Луко́,

врачу́ благи́й и ми́лостивый.

Молитва

Овсеблаже́нный испове́дниче, святителю отче наш Луко́, великий угодниче Христов! Со умилением приклоньше колена сердец наших, и припа́дая к раце честных и многоцелебных мощей твоих, якоже чадо отца молим тя всеусердно: услыши нас грешных и принеси молитву нашу к милостивому и человеколюбцу Богу, Емуже ты ныне в радости святых и с лики Ангел предстоиши. Веруем бо, яко любиши ны тою же любовию, е́юже вся ближния возлюбил еси, пребывая на земли. Испроси у Христа Бога нашего, да утвердит во святей своей Православней Церкви дух правыя веры и благочестия: пастырям ея да даст святую ревность и попечение о спасении вверенных им людей: право верующия соблюдати, слабыя и немощны́я в вере укрепляти, неве́дущия наставляти, противная обличати. Всем нам подай дар коему́ждо благопотребен, и вся яже к жизни временней и к вечному спасению полезная; градо́в наших утверждение, земли плодоносие, от глада и пагубы избавление; скорбящим утешение, недугующим исцеление, заблудшим на путь истины возвращение, родителем благословение, чадом в стра́се Господнем воспитание и научение, сирым и убогим помощь и заступление. Подаждь нам всем твое архипастырское и святое благословение, да тобою осеняеми, избавимся от козней лукаваго и избегнем всякия вражды и нестроений, ересей и расколов. Даруй нам богоугодно прейти́ поприще временныя сея́ жизни, настави нас на путь, веду́щий в селения праведных, избави нас воздушных мыта́рств и моли о нас всесильнаго Бога, да в вечней жизни с тобою непрестанно славим Отца и Сына и Святаго Духа, Емуже подобает всякая слава, честь и держава во веки веков.Ами́нь.