Акафисты

Иерей:  Благословен Бог наш.

Чтец:  Слава Тебе, Боже наш, слава Тебе. Царю Небесный: Трисвятое:поОтче наш.

Тропари сия,глас 6й

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас!

Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших: но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.

И ныне: Милосердия двери отверзи нам, благословенная Богородице: надеющийся на Тя да не погибнем, но да избавимся Тобою от бед: Ты бо еси спасение рода христианскаго.

Верую во единаго Бога Отца, Вседержителя…

Стихиры,глас 8й. Самогласны

Воспоим вси боголепно песньми божественными, Отца Безначальна, Сына Превечна и Духа Соприсносущна, Триипостасную державу, Едино Божество, едино царство и господство, едину волю и силу, пред Ними же всяко колено преклоняется небесных, земных и преисподних. (Дважды.)

Отцу и Сыну и Духу верно поклонимся вси, Троице Единосущней и Нераздельней, Юже выну славословят на небеси безплотных чинове: мы же Тоя милости и щедроты исповедуя, на земли возопиим: Отче создавый, Сыне искупивый, и Душе Святый освящаяй всех нас, Троице Пребожественная, слава Тебе!(Дважды.)

Егда в начале род человечь восхотел еси создати, Господи, тогда к Сыну Твоему собезначальному и Духу соприсносущному рекл еси, Благоутробне: сотворим человека по образу и подобию Нашему! Темже человеколюбному о нас смотрению чудящеся, вопием: Троице Пресвятая и благопромыслительная, Творче и Боже наш, слава Тебе!

Егда от Иоанна крещение совершашеся во Иордане, Тройческое явися поклонение, Отец возлюбленнаго Сына именуяй, Сын приемляй крещение от раба, Дух Святый сходяй с небесе в виде голубине: темже Божественным видением таинству наученнии, с верою вопием: Троице единосущная, тако явитися благоизволившая, помилуй и спаси нас!

Слава, и ныне,глас тойже:Приидите людие, Триипостасному Божеству поклонимся, Сыну во Отце со Святым Духом: Отец бо роди бездетно Сына соприсносущна и сопрестольна, и Дух Святый бе во Отце, с Сыном прославляемы едина сила, едино существо, едино Божество, Емуже покланяющеся, вси глаголем: Святый Боже, вся содеявый Сыном, содейством Святаго Духа: Святый Крепкий, Имже Отца познахом, и Дух Святый причде в мир: Святый Безсмертный, утешительный Душе, от Отца исходяяй и в Сыне почиваяй, Троице Святая, слава Тебе!

На стиховне стихиры,глас 2й

Троицу единосущную песнословим, Отца и Сына и Святаго Духа, Сию бо проповедаша вси пророцы, и апостоли с мученики.

Стих:  Сердце чисто созижди во мне, Боже, и Дух прав обнови во утробе моей.

Света безначальна и присносущна Отца, света незаходима и соприсносущна Сына, со Духом предвечно исходным светом, верою славим, любовию поем и надеждою превозносим во вся веки.

Стих:  Не отвержи мене от лица Твоего и Духа Твоего Святаго не отыми от мене.

Имеяй на небеси неумолкныя певцы славы Твоея, безплотных чинове, приими и от нас на земли хваление, Троице Пребожественная, ихже создала еси по образу и подобию Твоему.

Слава, и ныне: Видехом свет истинный, прияхом Духа Небеснаго, обретохом веру истинную, нераздельней Троице покланяемся, Та бо нас спасла есть.

Таже:  Господи, помилуй. (12 раз.) Слава, и ныне: Приидите, поклонимся: (Трижды.)Псалом 138: Господи, искусил мя еси и познал мя еси...

Тропарь,глас 8й

Благословен еси Трисвятый Господи Боже наш, Иже всю тварь премудростию Твоею создавый, и падший род человечь милостию Своею не оставивый, покаявшимся же грешником живот вечный даровати обещавый, Человеколюбие, слава Тебе!

Господи, помилуй(трижды).Слава, и ныне: Псалом 50... Помилуй мя, Боже...

Канон,глас 4й

Песнь 1, ирмос

Божественным покровен медленоязычный мраком извитийствова Богописанный закон, тину бо отряс очесе умнаго, видит Сущаго, и научается Духа разуму, хваля Божественными песньми.

Припев:Пресвятая Троице, Боже наш, слава Тебе!

Повелением Твоим, триипостасне Владыко и Господи, вся составишася, видимая и невидимая: повели убо душе, омраченной мглою греха, воздвигнутися к Твоему славословию!

Разумети Тя всецело ниже чинове могут невещественнии Ангельстии, Троице безначальная: мы же бренными усты неисповедимую наипаче благость Твою к нам недостойным пети и славити дерзаем.

Слава: Трисветлая единица Пребожественная, весь прожени грехов и страстей наших мрак, светлых лучей Твоих сладчайшим осенением, да яко чада света непреткновенно ходити возможем по пути заповедей Твоих.

И ныне: Троицы явилася еси честный храм, в немже Отец любовию, Сын плотию, Дух Святый нашествием обитель Себе сотвори, един истинный Бог наш, Егоже умоли о нас, Предстательнице всемощная.

Песнь 3

Разверзе утробы нечадствовавшия узы, досаду же неудоботерпиму благочадствующия, едина молитва пророчицы древле Анны, носящия дух сокрушен, к сильному и Богу разумов.

Исповедаемтися, Триипостасне Господи Боже наш, и вся души и тела нашего составы преклоняя, со умилением зовем: несмы достойни не точию призыва™ Тя, но ниже воззрети на высоту трисиятельныя славы Твоея.

От света безначальна собезначален Сын свет возсия, и соестественный свет Дух изыде, неизреченно и боголепно: нетленному убо рождению, вкупе же и неизреченному исхождению покланяемся.

Слава: Возсияй в сердцах, трисолнечное Божество, воспевающих Тя трисиянным светом Твоим: и подаждь всем нам разум, во еже ведати волю Твою и силу, во еже совершати Твое хотение, благое и совершенное, и величати и славити Тя.

И ныне: Радуйся, двере Господня непроходимая, радуйся, стено и покрове притекающим к Тебе, радуйся, спасения всех ходатаице: молящи не оскудевай ко Пресвятей Троице о славящих всепетое имя Твое.

Седален,глас 5й

Трисиятельнаго единаго Божества благочестно поем, вопиюще: Свят еси, Отче безначальный, собезначальный Сыне, и Божественный Душе: просвети нас верою Тебе служащих, и вечнаго огня исхити.

Слава, и ныне,глас 6й:Мати Пресвятая, Еяже молитвами род человеческий присно соблюдается, поклонися Отцу, умоли Сына, призови Святаго Духа, и умилостиви Бога в Троице единаго о множестве грехов наших, да Тобою помиловани бывше, Творца и Тебе благословим отныне и до века.

Песнь 4

Царю царей, яковый от яковаго, един Слове, произшедый от Отца безвиновнаго, равномощнаго Твоего Духа апостолам истинно послал еси, яко Благодетель, поющим: слава державе Твоей, Господи!

Долготерпение Твое, Отче, славим, милосердие Твое, Сыне, воспеваем, благодать Твою, Душе Святый, величаем и умильно вопием: Триипостасный Боже и Господи, милостив буди нам грешным!

Да трисиятельное Твое всем нам явиши Божество, создавый изначала человека, по образу Твоему и подобию вообразил еси его, ум ему и слово, и дух дав, яко Человеколюбец.

Слава: Яко создала еси нас по образу Твоему, Богоначальная и вседетельная Троице, вразуми убо и просвети нас, во еже хранити подобие Твое, творя волю Твою, благую и совершенную.

И ныне: Ты едина еси корень девства, Ты неувядаемый цвет чистоты, Ты стерла еси главу змиеву рождением Твоим: Ты убо избави нас от неисцельных страстей наших, и к пристанищу истиннаго покаяния настави.

Песнь 5

Решительное очищение грехов, огнедухновенную приимите Духа росу, о чада светообразная церковная! Ныне бо от Сиона изыде закон, языкоогнеобразная Духа благодать.

Во единомыслие впадше лукавства некогда, столп гордыни умыслиша создати сынове человечестии: Ты же показуя единую в триех Ипостасех державу, рекл еси равнодетельному Твоему Сыну и Духу: приидите сошедше, языки их смесим.

Отца, и Сына, и Духа Святаго, Тожде естество и Божество верою славим, троичное же Лицы, единаго же'невидимыя и видимыя твари Содетеля.

Слава: Егда нас постигнет нощь смертная, тогда, о безсмертный трисолнечный Содетелю! темной области отступити от нас повели, и свету вечному Твоему причастники ны сотвори.

И ныне: Чистейшая еси паче всякия чистоты, в Нейже един сый кроме греха обитель Себе сотвори, молитвами Твоими избави ны от злых наших деяний, нечистых помышлений и неподобных глаголаний.

Песнь 6

Очищение нам, Христе, и спасение, Владыко, возсиял еси от Девы: да яко пророка от зверя морскаго персей Иону, от тли исхитиши всего Адама, всеродна падшаго.

Вемы, о Пресвятая Троице, яко ничтоже скверно внидет в Твой пресветлый чертог: мы же всякия нечистоты исполнени есмы: обаче аще хощеши, можеши ны очистити: очисти убо, и в небесных Твоих селениих всели ны!

Древле Аврааму под дубом Мамврийским явился еси в триех Лицех, един сый естеством и хотением, Богословия тайну прообразуя: темже верно поем Тя, единоначальнаго Бога и Триипостаснаго.

Слава: Да Твоего благоутробия неизследимое, Владыко, покажеши богатство нам, Сына Твоего Единороднаго послал еси к нашей нищете, воображая нас крестом Его на первую светлость: ныне же просвети ны и одушеви Божественным Твоим Духом, да не высоты искупления отпадаем неразумие.

И ныне: Храм покажи ны трисветлаго Твоего богоначалия световиден, чисте служити Тебе, Зиждителю всех, и неизреченную Твою славу умно зрети, молитвами Богородицы, Юже достойно, яко преславную, величаем.

Поклонение Пресвятей Троице

Вся силы души моея, приидите, поклонимся Богу в Троице единому: Отцу, и Сыну, и Святому Духу!

Вся мысли сердца моего приидите, поклонимся Троице, в Единице почитаемей!

Вся чувства тела моего приидите, поклонимся, и восплачемся пред Господем, сотворшим нас!

Достойно есть воистинну покланятися Тебе, и славословити, и благодарити Тя, Троице Святая и единосущная, Юже вся Небесныя Силы, Херувимы и Серафимы, трисвятыми песньми восхваляют, вси святых лики благодарными гласы превозносят, Ейже всяко создание на небеси и на земли святолепно покланяется!

Кондак 1

Предвечный Царю веков и Господи, всея твари видимыя и невидимыя Содетелю, Емуже, в Троице Святей славимому Богу, всяко колено покланяется небесных, земных и преисподних: темже и мы, яко крещении в трисвятое имя Твое, аще и недостойнии, хвалебное сие дерзаем принести Тебе пение: Ты же, яко Творец, Промыслитель и Судия наш, вонми гласу раб Твоих, и не отстави милости Твоея от нас, да из глубины души выну зовем Ти: Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Икос 1

Архангели и Ангели, Начала и Власти, Престоли и Господствия, предстояще самому престолу славы Твоея, не довлеют изрещи величия совершенств Твоих: многоочитии же Херувимы и шестокрылатии Серафими, закрывающе лица своя, точию с трепетом и любовию взывают друг ко другу: Свят, Свят, Свят Господь Саваоф! Нам убо, иже прах и пепел есмы, кольми паче удобее любити молчание: но, да не толиких щедрот, в создании и искуплении на нас излиянных, непамятливы явимся и неблагодарни, подражая горнему славословию, с верою и любовию взываем: Свят, Свят, Свят еси, Господи Боже наш, неисповедимая совершенств высото и неизследимая тайн пучино! Свят еси, Господи Боже наш, везде сый и вся исполняли, единый и тойжде вчера, днесь и во веки! Свят еси, Господи Боже наш, вся могий, нарицаяй не сущая яко сущая, низводяй даже до ада и паки возводяй! Свят еси, Господи Боже наш, испытуяй сердца и утробы человеческия, исчитаяй звезды и всем им имена нарицаяй! Свят еси, Господи Боже наш, Егоже вси путие истинны и все судьбы оправданны вкупе и вожделенны! Свят еси, Господи Боже наш, отдая грехи отцев на чада, милуяй же и награждали в роды родов! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 2

Видев Тя Исаиа на престоле высоце и превознесение, глаголаше: о окаянный аз, яко человек сый и нечисты устне имый, и Господа Саваофа видех очима моима! Егда же угль горящий, носимый от Ангела, прикоснуся устом его, чисте восхваляше Тебе, Отца и Сына и Святаго Духа, единаго Бога. Попали убо, о Пресвятая Троице, огнем Божества Твоего терние и наших многих беззаконий, да чистым сердцем возопием Тебе: Аллилуиа!

Икос 2

Разум неуразуменный разумети ища великий во пророцех Моисей, глаголаше: яви мне Лице Твое, да разумно вижду Тя! Ты же к нему: задняя Моя узриши, Лице же Мое не явится тебе: не бо узрит человек лице Мое и жив будет. Нам же, аще и недостойным, благоволил еси явити Себе в лице Единороднаго Сына Твоего: темже благодарне вопием: Свят, Свят, Свят еси, Господи Боже наш, Серафимов пламенно горящая любы и Херувимов выну светящая премудросте! Свят еси, Господи Боже наш, небесных Престолов превышний Царю и премирных Господствий всеистинный Господи! Свят еси, Господи Боже наш, вышних Сил непобедимая крепосте и горних Властей всемогущий Властителю! Свят еси, Господи Боже наш, Архангелов всерадостное благовестие и Ангелов неумолкающая проповедь! Свят еси, Господи Боже наш, разумных начал верховное Всеначало, и всех прочих небесных чинов державный Повелителю! Свят еси, Господи Боже наш, един имеяй безсмертие и живый во свете неприступнем, со избранными же Твоими, яко со други, Лицем к лицу беседуяй! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 3

Силою неизреченнаго могущества Твоего вся содержиши, словом неизследимыя премудрости Твоея вся строиши, духом уст Твоих вся живиши и радуеши, о трисолнечне Вседетелю! Измерил еси небо дланию и землю пядию, носиши и питаеши всю тварь, вся по имени призываеши, и несть могий утаитися властительныя десницы и взора Твоего: сего ради со всеми вышними и нижними силами, со умилением припадающе, зовем Ти: Аллилуиа!

Икос 3

Имеяй всякое создание работно повелению Твоему, всюду являеши следы Промысла и неизчетных совершенств Твоих: темже невидимая Твоя и присносущную силу и Божество, твореньми помышляема, видяще, со удивлением и радостию зовем: Свят, Свят, Свят еси, Господи Боже наш, властительный Содетелю видимых и невидимых, и любвеобильный Строителю настоящих и грядущих! Свят еси, Господи Боже наш, от четырех стихий составивый тварь и четырьми времены круг лета венчавый! Свят еси, Господи Боже наш, повелевый солнцу светити во дни, и луне со звездами просвещати нощь! Свят еси, Господи Боже наш, изводяй ветры от сокровищ, одеваяй небо облаки, и посылали дождь и росу в прохлаждение зноя! Свят еси, Господи Боже наш, препоясуяй холмы радостию и долы веселием, украшаяй крины сельные и венчали поля класами! Свят еси, Господи Боже наш, посылаяй пищу птенцем врановым, напаяяй вся звери сельныя, и полагали щедроты Своя на всех делех Своих! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 4

Бурю внутрь имея душепагубныя ереси, вторый Иуда, Арий безумный, отвержеся Тебе Сына Божия, единаго от Пребожественныя Троицы быти: мы же аще и ино Лице Отчее, ино Сыновне, ино Святаго Духа глаголем: но Отчее, Сыновнее и Святаго Духа едино Божество, равну силу, соприсносущно величество, сердцем и устны исповедуем, и яко трисолнечным светом в купели крещения озареннии, Отцу, и Сыну, и Святому Духу, единому Богу покланяемся, зовуще: Аллилуиа!

Икос 4

Слышавше Пастыри и Учителие Святыя Церкве Ария, яко лютаго зверя, вторгшеся в словесное Христово стадо, и восхищающа овцы от истиннаго исповедания православныя веры, сошедшеся в Никеи на Соборе, Бога, а не тварь, Христа исповедаша, и равна Отцу Сына и Святаго Духа чтуще, громогласне возгласиша: Свят, Свят, Свят еси, Господи Боже наш, Боже Отче, Боже Сыне, Боже Душе Святый, единый истинный Боже, а не три Бози! Свят еси, Господи Боже наш, несозданный Отче, несозданный Сыне, несозданный Душе Святый, Едине вкупе несозданне, а не три особь несозданны! Свят еси, Господи Боже наш, Отец раждаяй предвечно Сына, Сын раждаемый безлетно от Отца, Дух Святый из Негоже от век происходяй, но не раждаяся! Свят еси, Господи Боже наш, Отец воззвавый нас от небытия, Сын искупивый нас падших Крестом Своим, Дух Святый освящали и животворяяй всех Своею благодатию! Свят еси, Господи Боже наш, в духе, душе и теле нашем трехчастную скинию, на вселение Свое основати благоволивый, и всеконечне грехов разрушитися ей в нас не попустивый! Свят еси, Господи Боже наш, знамение Триипостаснаго Существа Своего на всех делех рук Своих, в мире видимом и невидимом, положивый! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 5

Пребезначальная и вседетельная Троице, создав нас по образу и по подобию Твоему, заповедала еси творити угодная пред Тобою: мы же, окаяннии, злую волю нашу возлюбивше, обеты крещения отвергохом, образ Твой помрачихом: ныне же паки к Тебе прибегаем и молимся, подаждь нам благодать Твою, исхити нас из руки враг, видимых и невидимых, и спаси ны, имиже веси судьбами, да во веки веков зовем Тебе: Аллилуиа!

Икос 5

Видя разум превосходящая совершенства Твоя и неизреченныя благодеяния к бедным сынам Адамлим (в Тя бо Триединаго Бога истинно веруяй, мертвый духом оживляется, оскверненный совестию очищается, погибший спасается) благодарным умом, благодарным сердцем, благодарными усты, от Тебе созданными, преклоныпе колена, глаголем: Свят, Свят, Свят еси, Господи Боже наш, в Триипостасном Совете Твоем положивый сотворити человека, и в тело его, от персти взятое, дыхание жизней из уст Твоих вдохнувый! Свят еси, Господи Боже наш, образом и подобием Твоим в лице Адама всех нас почтый, и рая сладости наследники учинивый! Свят еси, Господи Боже наш, разумом превыше всего видимаго вознесый нас, и тварь всю дольнюю под нозе наши покоривый! Свят еси, Господи Боже наш, древо жизни в пищу нам даровавый и даром безсмертия ны обогативый! Свят еси, Господи Боже наш, преслушавших заповедь прародителей наших и по грехопадении не оставивый, но на уповании спасения прямо Едема вселивый! Свят еси, Господи Боже наш, изведый и нас из чрева матере нашея и благодатию Евангелия по рождении освятивый! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 6

Проповедник правды и ревнитель святаго имени Твоего, Илиа досточудный, воззван от Ангела, ста в горе Хориве: бысть же дух крепок, низлагаяй горы, бысть трус велий и огнь палящь, но не в сих Тя виде, и по огне глас хлада тонка и тамо Господь: покрыв убо лице милотию, с веселием и страхом взываше: Аллилуиа!

Икос 6

Возсиял еси в просвещение всему миру сияние трисветлаго Божества Твоего, отгнал еси вся идольская заблуждения, Триипостасный Боже и Господи: весь же род человеческий от долгая тьмы язычества в чудный свет Евангелия привел еси, имже озареннии, славим вседержавный Промысл Твой о нас, зовуще: Свят, Свят, Свят еси, Господи Боже наш, до конца растленную грехом тварь водами потопными потребивый, и в лице Ноя обновивый весь род человечь! Свят еси, Господи Боже наш, отлучивый отца верующих Авраама от смешения язык и в потомстве его истинную Церковь основавый! Свят еси, Господи Боже наш, изведый люди Своя из Египта, препитавый их манною в пустыне и введый в землю, кипящую медом и млеком! Свят еси, Господи Боже наш, воздвигни Давида, исполнивый Духом Своим пророки, и теми среди Израиля веру в обетованного Искупителя сохранивый! Свят еси, Господи Боже наш, пленом Вавилонским согрешшыя люди Своя наказавый и, по скончании его, паки Иерусалиму возградитися повелевый! Свят еси, Господи Боже наш, Маккавеи в вере и поеданиях отеческих непоколебимыми до смерти показавый, и Церковь подзаконную, яко невесту, до пришествия возлюбленнаго Жениха, целу соблюдый! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 7

Хотя проявити величие любви и милосердия Твоего к падшему роду человеческому, егда прииде кончина лета, послал еси Единороднаго Сына Твоего, раждаема от Жены, бываема под законом, да подзаконныя искупит, иже, пожив на земли яко Человек и искупив ны Крестом Своим, вознесеся на небо, отнюдуже, исполняли обетование, низпосла нам Пресвятаго Духа Своего, да зовем вси: Аллилуиа!

Икос 7

Дивное воистинну и новое показал еси чудо, дивный в высоких Господи, егда по низпослании Пресвятаго Духа на избранныя ученики и апостолы, извел еси их на проповедь всему миру, да возвестят великое имя Пресвятыя Троицы и пленят вся языки в послушание веры: темже, чудящеся силе и действию Богодухновенных словес их, с радостию зовем: Свят, Свят, Свят еси, Господи Боже наш, избравый немощная, худородныя и убогия мира, да посрамят крепкия, славныя и премудрыя! Свят еси, Господи Боже наш, воодушевивый безчисленные сонмы мучеников, да тмами мучений и смертей запечатлеют истину Евангелия и силу благодати Христовой! Свят еси, Господи Боже наш, сердце равноапостольнаго Константина знамением Креста преклонивый, и тем конец лютым гонениям на христиан положивый! Свят еси, Господи Боже наш, седмию Вселенскими Соборы богоносных отец, яко седмию столпы, Церковь оградивый, и еретическим треволнениям неприступну сотворивый! Свят еси, Господи Боже наш, богомудрым учителям и великим подвижникам благочестия, яко пресветлым звездам на тверди Церкви, возсияти даровавый! Свят еси, Господи Боже наш, и владыку земли Российстей, Владимира, к свету истинныя веры наставивый, и тем всю страну нашу от прелести многобожия свободивый! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 8

Странно и чудно у дуба Мамврийска узрев Тя Авраам во образе триех мужей, аки к единому беседоваше, глаголя: Господи, аще обретох благодать пред Тобою, не мини раба Твоего! Трием убо, в триех явлынихся ему Лицах, Отцу и Сыну и Святому Духу, единому же в Существе Богу, до земли поклонися, зовый: Аллилуиа!

Икос 8

Весь еси везде и всегда, не точию могуществом неизчетныя силы Твоея, но и богатством вседетельнаго промышления Твоего о всяком создании Твоем: нам же, якоже рече Сын Твой, и власи главнии вси изочтени суть у Тебе, да ни един из них падет без воли Твоея: темже уповающе на Промысл Твой, со дерзновением и любовию зовем: Свят, Свят, Свят еси, Господи Боже наш, благоволивый всему роду человеческому разделитися на племена и языки, и коемуждо их место и время жительства указавый! Свят еси, Господи Боже наш, Имже царие царствуют и сильнии пишут правду, соблюдаяй избранных Своих, яко зеницу ока! Свят еси, Господи Боже наш, от Негоже исходит всяка премудрость и разум, всяка крепость и сила, всяко здравие и лепота! Свят еси, Господи Боже наш, наводяй и отъемляй брани, венчаяй победою правое оружие, неправое же посреде самых побед предопределяяй к сокрушению! Свят еси, Господи Боже наш, даяй знамения на небеси и на земли, посылаяй огнь, язву и глад на люди, да не до конца заблудят от путей Твоих! Свят еси, Господи Боже наш, возносяяй смиренныя от земли, еже посадити со князи люди Своя, и низлагаяй гордыя, яко не обрестися месту их! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 9

Всякое естество, горе и низу, непрестанно славит Тя, Предвечнаго Творца и Бога: на небеси едини, Свят, Свят, Свят, день и нощь взывают, друзии же венцы своя к подножию ног Твоих полагают: на земли же со всею тварию мы, яко украшенныя образом присносущныя Твоея славы, к Тебе молимся и от Тебе великия и богатая милости чаем, зовуще: Аллилуиа!

Икос 9

Ветии многовещанныя, аще и много труждаются мыслию во испытании о таинстве Пресвятыя Троицы, но не могут разумети, како естеством един есть Бог, в триех же совершенных Лицех: мы же веруем точию сему и исповедуем, какоже, не испытуем, и неизчетныя благодеяния к нам коегождо из триех Божественных Лиц добре ведуще, с верою и благодарением зовем: Свят, Свят, Свят еси, Господи Боже наш, праведным судом Твоим всем нам в землю, от неяже взяты есмы, возвратитися, и паки в день воскресения из нея востати положивый! Свят еси, Господи Боже наш, солнцу, луне и звездам некогда померкнути, земле и всему, еже на ней, огнем преобразитися предопределивый, да вместо их явится небо ново и земля нова, в нихже правда живет! Свят еси, Господи Боже наш, уставивый день, в оньже предстанут на суд вся племена и языцы, да восприимет кийждо по делом своим! Свят еси, Господи Боже наш, имеяй в день воздаяния рещи праведным: приидите благословеннии Отца Моего, и наследуйте Царствие, уготованное вам от сложения мира! Свят еси, Господи Боже наш, от Негоже нераскаяннии грешницы услышат тогда со страхом: отъидите от Мене проклятии во огнь вечный, уготованный диаволу и аггелом его! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 10

Спасти хотя мир, явилася еси на Иорданстей реце, Пресвятая и Пребожественная Троице: Отец во гласе с неба, свидетельствуяй о возлюбленнем Сыне, Сын во образе человечестем, приемляй крещение от раба, Дух Святый, сходяй на крещаемаго в виде голубине: Отца, Сына и Святаго Духа, научихомся просвещати крещением всякаго грядущаго в мир человека, зовуще: Аллилуиа!

Икос 10

Царю превечный, сияяй солнце Свое на благия и злыя, праведныя любяй, грешныя же милуяй, скверну душевную и телесную нашу омый, обитель Свою в нас, аще и недостойных рабех Твоих, сотворити благоволи, потреби нечистая наша помышления, изглади неподобныя деяния, направи язык глаголати благодарная пред Тобою, да чистым сердцем и устны со умилением зовем: Свят, Свят, Свят еси, Господи Боже наш, о Немже Апостольский лик яве глаголет, к Немуже пророческий собор выну взирает! Свят еси, Господи Боже наш, Егоже полк мученический благолепно исповедует, и преподобных воинство пресвятое имя славословит! Свят еси, Господи Боже наш, о Немже пустынников множество присно воздыхает, от Негоже постников подвиги венчаются! Свят еси, Господи Боже наш, Емуже святители и пастыри благодарственное приносят пение, Имже вселенстии учители во спасение наше богомудрствуют! Свят еси, Господи Боже наш, приими мольбу о нас и предстательство всех святых, паче же простирающую к Тебе о нас руце Свои Деву Пречистую! Свят есч, Господи Боже наш, огради нас святыми Твоими Ангелы, и отжени от нас духов злобы поднебесных! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 11

Пение всякое изнемогает, тщащееся принести должное благодарение Тебе о всех и за вся, в Троице славимому Богу: не обретается бо ни разума, могущаго сраспростретися мыслию ко множеству щедрот Твоих на нас, ни слова, во еже достойне изрещи я: обаче за вся, нами видимая и нам подаемая, буди Тебе, Пресвятая Троице, благодарение от нас, честь и слава, яковыже Ты Сама Твоего величества достойны и Тебе угодны веси: мы же покланяющеся Тебе со смирением и любовию зовем: Аллилуиа!

Икос 11

Яко светоподательна Тя во обетованиих Твоих светильника, сущим нам во тьме неведения, о будущем жребии нашем явльшася, благодарне исповедующе и поне единаго из блаженств, Единородным Сыном Твоим возвещенных, улучити желающе, всеумильно с верою вопием: Свят, Свят, Свят еси, Господи Боже наш, уготовавый избранным Своим блага, ихже око не виде, ухо не слыша, и яже на сердце человеку не взыдоша! Свят еси, Господи Боже наш, Егоже вси чистии сердцем узрят, якоже есть, и познают, якоже от Него сами Познани суть! Свят еси, Господи Боже наш, в Немже вси алчущий и жаждущий правды обретут николиже оскудевающее насыщение! Свят еси, Господи Боже наш, от Негоже миротворцы, яко подражатели вся умиротворившаго Единороднаго Сына Твоего, возлюбленными сынами нарекутся! Свят еси, Господи Боже наш, у Негоже кротцыи наследят землю, и нищий духом улучат нескончаемое Царствие! Свят еси, Господи Боже наш, обещавый вечное помилование милующим, и безконечное радование плачущим! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 12

Благодать Твою всесильную подаждь нам, Пресвятая Троице: приими исповедание грехов наших пред величием славы Твоея, призри на воздыхания наша, низпосли нам духа умиления и щедрот, да очищенные душею и сердцем сподобимся неосужденно звати к Тебе на земли, якоже взывают Ангели на небеси: Аллилуиа!

Икос 12

Поюще Твое всечеловеколюбное смотрение, славим Тя вси, Пребезначальная Троице, веруем в единаго Бога Отца, Бога Сына, и Бога Духа Святаго, иного, разве Тебе, Господа не вемы, к Тебе припадаем и Тебе молимся, вопиюще: Свят, Свят, Свят еси, Господи Боже наш, буди нам во спасение, да не убоимся никоегоже зла, и в защищение живота нашего, да не устрашимся никоегоже врага! Свят еси, Господи Боже наш, грешныя кающияся спасаяй, спаси убо и нас многогрешных! Свят еси, Господи Боже наш, умножаяй всем милость Твою, умножи ю и на нас, и помилуй ны, яко немощни есмы! Свят еси, Господи Боже наш, продолжи нам век к покаянию и не осуди нас на посечение с смоковницею безплодною! Свят еси, Господи Боже наш, избави ны искушений, от мира, плоти и диавола находящих, и укрепи в вере и любви к Тебе! Свят еси, Господи Боже наш, сподоби ны лицем к лицу узрети Тя, и внити в светлый чертог Твой на брак Агнчий! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 13

О Пресвятая, Животворящая, Неразделимая и Вседетельная Троице, Отче, Сыне и Душе Святый, едине истинный Боже и Творче наш! Нынешнее наше приемши благодарение, низпосли нам благодать и силу от высоты святаго престола Твоего, да поправше вся плотския похоти, во всяком благочестии и чистоте поживем до конца дней наших, выну восхваляюще пресвятое имя Твое и зовуще: Аллилуиа!(Трижды.)

Таже Икос 1. "Архангели и Ангели..." и Кондак 1: "Предвечный Царю веков..."

Песнь 7

Согласная возшуме органская песнь, почитати златосотворенный бездушный истукан: Утешителева же светоносная благодать почествует, еже вопити, Троице единая, равносильная, безначальная, благословена еси.

Отрасль сугуба и безначальна от Отца, яко от безначальна корене, произниче, Сын рождением и Дух исхождением, соестественна и нераздельна силою и властию, яко трием быти светом во едином свете Божества.

В пещь огненную похоти мучитель мой, злый обычай, вверже мя: но Ты, Троичне Вседетелю, яко триех отрок спасл еси, спаси мя Отче, Сыне и Душе Святый, да зову Тебе: Троице единая, равносильная, безначальная, буди благословенно имя Твое.

Слава: Неисчетна Твоя дарования, яже подала еси нам, Троице, от начала живота нашего даже до сего дне и часа: велика и безмерна суть, яже еще имаши дата: за вся сия благодарим Тя, сердцем и устны поя: Троице единая, равносильная, безначальная, преблагословенна еси!

И ныне: Вся рукама Твоима от Господа приях, Дево Пресвятая: сего ради благодарственное пение приношу Тебе, и Тобою Отцу, и Сыну, и Святому Духу пою: благословенна еси, Троице единая: благословенна и Ты в женах, Пренепорочная Владычице!

Песнь 8

Разрешает узы и орошает пламень, трисветлый Богоначалия образ поют отроцы, благословит же единаго Спаса и Вседетеля, яко Благодетеля, сотворенная всяческая тварь.

Множество умных существ непрестанно поют Тя недомыслимаго Бога: с нимиже и мы славим, глаголюще: Троице пресущественная, Твоя рабы спаси, яко Человеколюбивая.

Ум безначальный Слово неизглаголанно роди, и Божественнаго Духа самоизведе равномощна: сего ради Троицу единосущную, Владыку всех Бога проповедуем.

Слава: Многих ради грехов наших многих достойни мук, доселе невредими есмы: и живем Твоею благодатию, Троице всемилосердая: темже со слезами припадающе славим Тя, глаголюще: благословите вси единаго Триипостаснаго Бога и Содетеля, яко Благодетеля, сотворшаго и хранящаго всяческую тварь.

И ныне: Величаю Твое твердое заступление, исповедую Матерния молитвы Твоея силу, благодарю возвеличившую и избравшую Тя Троицу Пресвятую, и пою: Бога и Божию Матерь вся внутренняя моя хвалите и превозносите во веки.

Песнь 9

Радуйся, Царице, матеродевственная славо: всяка бо удобообращательная и благоглаголивая уста витийствовати не могут, Тебе пети достойно, изумевает же ум всяк, Твое рождество разумети: темже Тя согласно славим.

Свят и препрославлен Отец Бог превечный: Свят и препрославлен Сын, из Отца рожденный: Свят же и препрославлен и Животворящий Дух, исходяй от Отца, Сыном же являем.

Сами суще недостойни не точию молитися, но ниже приступити к Тебе, о Троице, приносим в мольбу о нас подвиги святых апостол, пророк, мучеников и исповедников, труды и слезы преподобных постников и всех от века Тебе благоугодивших; приими я в пренебесный Твой жертвенник, и не отрини нас нечистых.

Слава: Молебную сию песнь соединяем с любовию Твоею, Боже Отче, с Кровию Твоею, лучше глаголющею неже Авелева, Сыне Единородный, с неисповедимою благостию Твоею, Душе Пресвятый и мили деемся: не презри косноязычнаго сего моления нашего, и от дерзновения, еже к Тебе, не отрини рабы Твоя.

И ныне: Общую всех надежду, Деву Пречистую, в мольбу о нас грешных приводим Тебе, Отче, Сыне и Душе Святый: помилуй нас и подаждь благая вечная и временная, молитвами честнейшия Херувимов и всех Сил Небесных.

Светилен

Божественнаго естества единосущнаго трисолнечную поем державу, и трисвятыми гласы зовем: Свят еси, Отче Пребезначальный, Свят еси, Сыне Собезначальный, и Душе Святый, едине нераздельный Боже наш, и всех Творче, человеколюбивый.

Слава: Отче и Сыне со Духом Святым, призри на ны, верою тебе покланяющыяся и славящыя державу Твою, и возопий поющим Тя: Аз есмь с вами, и никтоже на вы.

И ныне: Свет Богоначальный от чрева Твоего возсиявый, Богомати Пречистая, весь мир трисолнечным светом озари, и землю якоже другое небо показа, да вся дела Господня Господа поют и превозносят во вся веки.

На хвалитех стихиры,глас 4й, самогласны

Преславная днесь видеша вси языцы во граде Давидове, егда Дух сниде Святый во огненных языцех, якоже благоглаголивый Лука повествует, глаголет бо: собранным учеником Христовым, бысть шум, якоже носиму дыханию бурну, и исполни дом, идеже бяху седяще: и вси начаша глаголати странными учении, странными повелении Святыя Троицы.(Дважды.)

Дух Святый бе убо присно, и есть, и будет, ниже начинаем, ниже престаяй, но присно Отцу и Сыну счинен и счисляем, живот и животворяй, свет, и света податель, самоблагий, и источник благостыни: Имже Отец познавается, и Сын прославляется и от всех познавается, едина сила, едино счетание, едино поклонение Святыя Троицы.

Дух Святый, свет и живот, и живый источник умный: Дух премудрости, Дух разума: благий, правый, умный: обладаяй, очищаяй прегрешения: Бог и боготворяй: огнь, от огня происходяй, глаголяй, деяй, разделяяй дарования, Имже пророцы вси и божественнии апостоли с мученики венчашася: странное слышание, странное видение, огнь разделяяйся в подаяние дарований.

Слава, и ныне,глас 6й:Царю Небесный, Утешителю, Душе истины, Иже везде сый и вся исполняли, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Молитва к Богу Отцу

Всемогущий Владыко, премудрый и всеблагий Господи, светоначальнаго Сына Пребезначальный Родителю, и Животворящаго Духа Твоего вечный и присносущный Самоизводителю, Егоже величество неисчетно, и слава несказанна, и милость безмерна! Благодарим Тя, яко воззвал еси нас от небытия и почтил еси драгоценным образом Твоим, яко даровал еси нам недостойным не точию познавати и любити Тя, но еже сладостнейше есть, и Отцем своим нарицати Тя. Благодарим Тя, Боже милосердия и щедрот, яко преступивших заповедь Твою не оставил еси нас посреде греха и сени смертныя, но благоволил еси Единороднаго Твоего Сына, Имже и вецы сотворени суть, послати на землю нашего ради спасения, да вочеловечением Его и страшными страданьми мучительства диаволя и тли смертныя свободимся. Благодарим Тя, Боже любве и сил, яко, по вознесении на небо дражайшаго Спасителя нашего, умолен быв Крестом Его, низпослал еси и Духа Твоего Пресвятаго на избранныя Его ученики и апостолы, да силою Богодухновенныя проповеди их, озарят весь мир нетленным светом Евангелия Христова. Сам убо, человеколюбивый Владыко, услыши ныне смиренную молитву недостойных чад Твоих, и якоже создал еси нас за едину Твою благость, искупил еси ны за едино благоутробие Твое, тако и спасеши нас по единому безприкладному милосердию Твоему: зане от дел наших ниже стени спасения имамы, но чаяние праведныя мести и отлучения от пресветлаго Лица Твоего: Аще бо и о единем празднем глаголе взыскано будет в день суда и испытания, о неисчетных наших беззакониих, имиже согрешихом пред Тобою, кий, бедные, имамы воздати ответ; Сего ради весьма от дел наших отчаявшеся оправдания, ко Твоей единей, всяк ум и всяко слово превосходящей, прибегаем благости, юже аки твердое основание надежды имуще, молим Тя: согрешихом, очисти, Господи! беззаконновахом, прости, Владыко! прогневахом Тя, примирися, Долготерпеливе! и сохрани прочее ум, совесть и сердце наше от скверн мирских, избави и спаси ны от многомятежныя бури страстей и грехопадений, вольных же и невольных, ведомых и неведомых, и в тихое нас управи пристанище веры, любве же и упования жизни вечныя. Помяни нас в милости Твоей, Господи, даруй нам вся, якоже ко спасению, прошения, паче же чистое и безгрешное житие: сподоби нас любити Тя, и боятися от всего сердца нашего, и творити во всем волю Твою святую, молитвами Пречистая Владычицы нашея Богородицы и всех святых Твоих. Яко благ и человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и Животворящим Твоим Духом, ныне и присно и во веки веков. Аминь.

Молитва к Богу Сыну

Единородне Сыне и Слове Божий, изволивый нашего ради спасения воплотитися и смерть претерпети, ныне же, и со пречистою Плотию Твоею, на небесах на престоле со Отцем седяй, и всем миром управляяй! Не забуди милосердием Твоим нас, долу сущих и многими напастьми и скорбьмй искушаемых, иже аще и весьма нечисти и недостойни есмы, но в Тебе Спасителя и Господа нашего веруем, и иного Ходатая и надежды спасения не вемы. Подаждь, о Искупителю Всеблагий, да памятуем выну, коликих мучений души и тела Твоего потребно бяше, во еже удовлити за грехи наши вечной правде Отца твоего, и како даже до ада со Креста низшел еси пречистою душою Твоею, да нас от власти и мучительства адова свободиши: памятуя же о сем, да блюдемся от страстей и грехов наших, бывших виною лютых страданий и смерти Твоея, и да любим правду и добродетель, еже всякаго дара Тебе в нас приятнейши есть. Яко искушенный по всяческим, Сам веси, о Всеблагий, коль велика есть немощь духа и плоти нашея, враг же наш силен и злохитр, иже яко лев рыкая ходит, иский кого поглотити: не остави убо нас Твоею всесильною помощию, и буди с нами выну, храня и покрывая, наставляя и укрепляя, радуя й веселя дух наш. Мы же, на лоно любве и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да имиже веси судьбами, сотвориши нам прейти безбедно мрачную жития сего земнаго юдоль и достигнута Богокраснаго чертога Твоего, егоже обещал еси уготовати всем верующым во имя Твое и последующым Божественным стопам Твоим. Аминь.

Молитва к Богу Духу Святому

Царю Небесный, Утешителю Всеблагий, Душе истины, от Отца предвечно исходяй и в Сыне выну почиваяй, независтный Источниче дарований Божественных, разделяя их коемуждо, якоже хощеши, Имже и мы недостойнии освятихомся и назнаменани есмы в день крещения нашего! Призри на молитву раб Твоих, прииди к нам, вселися в ны, и очисти душы нашя, да будем уготовани в жилище Пресвятыя Троицы. Ей, о Всеблагий! не возгнушайся нашея нечистоты и ран греховных, но исцели я всеврачующим помазанием Твоим. Просвети наш ум, да разумеем суету мира и яже в мире: оживи нашу совесть, да неумолчно возвещает нам, яже подобает творити и ихже отметатися: исправи и обнови сердце наше, да не источает прочее день и ночь помышлений злых и желаний неподобных: укроти плоть и угаси росоносным дыханием Твоим пламень страстей, имже помрачается в нас драгоценный образ Божий. Духа праздности, уныния, любоначалия и празднословия отжени от нас, подаждь же нам духа любве и терпения, духа кротости и смиреномудрия, духа чистоты и правды, да исправивше разслабленная сердца наша, неленостно течем по пути заповедей святых, и тако, избегая всякаго греха и исполняя правду, сподобимся улучити кончину мирну и непостыдну, внити во Иерусалим Небесный и тамо покланятися Тебе, купно со Отцем и Сыном, поя во веки веков: Троице Святая, слава Тебе!

Молитва ко Пресвятей Троице

Пресвятая Троице, Единосущная Державо, всех благих вина, что воздадим Тебе за вся, яже воздала еси нам, грешным и недостойным, прежде, нёже на свет произыдохом, за вся, яже воздаеши коемуждо нас по вся дни и яже уготовала еси всем нам в вёце грядущем? Подобаше убо, за толйкия благодеяния и щедроты, благодарите Тя не словесы точию, но паче делы, храняще и исполняюще заповеди Твоя: мы же, страстей нашим и злым обычаям внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред трисветлое Лице Твое безстудно явитися, но ниже имене Твоего пресвятаго изрещй довлёяше нам, аще бы не Ты Сама благоизволила во отраду нашу, возвестите, яко чистыя и праведныя любящи, грешники кающияся милуеши и благоутробне приемлеши. Призри убо, о Пребожественная Троице, с высоты святыя славы Твоея на нас многогрешных и благое произволение наше вместо благих дел приимй: и подаждь нам духа истиннаго покаяния, да возненавидевше всякий грех, в чистоте и правде до конца дней наших поживем, творяще пресвятую волю Твою и славяще чистыми помыслы и благими деяньми сладчайшее и великолепное имя Твое. Аминь.

Таже: Достойно есть: Трисвятое:поОтче наш: Тропарь: Благословен еси: Господи, помилуй,(40 раз), иотпуст.